ۇزاق ۋاقىت بويى جۇرگىزۋشى كۋالىكتەرىن زاڭسىز بەرۋمەن اينالىسقان قىلمىستىق توپتار ۇستالدى

استانا. قازاقپارات - بىرنەشە وڭىردەگى قىلمىستىق توپتاردىڭ قىزمەتى توقتاتىلدى، - دەپ حابارلايدى Massaget.kz.

جامبىلدىق پوليتسەيلەر ەلىمىزدىڭ وڭتۇستىك وڭىرلەرى، اتاپ ايتقاندا جامبىل، تۇركىستان وبلىستارى، الماتى جانە شىمكەنت قالالارىنىڭ تۇرعىندارىنان تۇراتىن قىلمىستىق توپتىڭ قىزمەتىن توقتاتتى. ولار ءتيىستى وقىتۋ ساباقتارىن جانە كولىك باسقارۋىن تاجىريبە جۇزىندە تەكسەرمەستەن، اقشالاي سىياقى ءۇشىن جۇرگىزۋشى كۋالىكتەرىن زاڭسىز بەرۋمەن ۇزاق ۋاقىت بويى اينالىسقان.

قىلمىستىق سحەماعا ح ق ك و قىزمەتكەرلەرى جانە جوعارىدا اتالعان وڭىرلەردەن جۇرگىزۋشى كۋالىگىن العىسى كەلەتىن كليەنتتەردى ىزدەۋمەن اينالىسقان «كومەكشىلەر» كىرگەن. قۇجاتتار تاراز قالاسىنىڭ حالىققا قىزمەت كورسەتۋ ورتالىقتارىندا رەسىمدەلىپ، بەرىلگەن.

12-اقپاندا جوعارىدا اتالعان وڭىرلەردە كۇدىكتىلەردىڭ جۇمىس ورىندارى مەن تۇرعىلىقتى جەرلەرى بويىنشا قۇرىقتاۋ جانە تەرگەۋ ءىس- شارالارى جۇرگىزىلدى. ونىڭ ىشىندە حالىققا قىزمەت كورسەتۋ ورتالىقتارىنىڭ باسشىلارى مەن لاۋازىمدى ادامدارى ۇستالدى.

تىركەلگەن قىلمىستىق ىستەر اياسىندا تەرگەۋ ارەكەتتەرى جۇرگىزىلۋدە. قازىرگى ۋاقىتتا جۇرگىزۋشى كۋالىكتەرىن زاڭسىز بەرۋدىڭ 35 دەرەگى انىقتالىپ، قىلمىستىق سحەمانى ۇيىمداستىرۋشىلار مەن ورىنداۋشىلار ۋاقىتشا ۇستاۋ يزولياتورىنا قاماققا الىندى.