زاڭبۇزۋشىلىق تۋرالى پوليتسياعا حابار بەرگەندەردى ىنتالاندىرۋ شاراسى كەڭەيتىلۋى مۇمكىن

استانا. KAZINFORM - ىشكى ىستەر ءمينيسترىنىڭ ورىنباسارى يگور لەپەحا زاڭ بۇزعانداردى پوليتسياعا كورسەتكەندەردى ىنتالاندىرۋ شاراسى كەڭەيتىلۋى مۇمكىن ەكەنىن ءمالىم ەتتى.

- بۇگىن ءوزىڭىز تانىستىرعان زاڭ جوباسى ارقىلى قۇقىق بۇزۋدىڭ الدىن الۋعا قاتىسقان ازاماتتاردى ىنتالاندىرۋ شارالارىنىڭ اياسىن كەڭەيتپەكشىسىزدەر. بۇل حالىق اراسىندا ءبىر-ءبىرىن كورسەتۋ، قۇزىرلى ورگاندارعا ءسوز تاسۋ ادەتىن ۇدەتىپ جىبەرمەي مە، - دەپ سۇرادى جۋرناليست ءماجىلىس كۋلۋارىندا.

ءمينيستردىڭ ورىنباسارى مۇنداي شارا نە ءۇشىن قاجەت ەكەنىنە توقتالدى.

- سۇراعىڭىزدى وسىنداي ماندە بولاتىنىن بىردەن ءتۇسىندىم. ول قۇجاتتا ءبىز جەرگىلىكتى اكىمدىكتەردىڭ جۇمىسىن بەلسەندى ەتۋگە باعىتتالعان نورما ەنگىزبەكشىمىز. قانداي قۇقىق بۇزۋ فاكتىلەرىن حابارلاعانى ءۇشىن ىنتالاندىرۋ شاراسى قولدانىلاتىنىن سول اكىمدىكتەر بەلگىلەيدى. بۇل جەردە ەكى سانات بار. ءبىرى - بىزبەن بىرگە پاترۋلگە شىعىپ، قۇقىق بۇزۋ فاكتىلەرىن انىقتاۋعا قولعابىس ەتەتىن قوعامدىق كومەكشىلەر. ولار ءقازىردىڭ وزىندە توقسان سايىن سىياقى تۇرىندە ىنتالاندىرۋ الىپ تۇرادى. ەندى قۇقىق بۇزۋ فاكتىسى نەمەسە قىلمىس تۋرالى حابارلاعان تۇلعالاردى اكىمدىكتەر ىنتالاندىرا الادى، - دەدى ول.

ايتۋىنشا، ىنتالاندىرۋدىڭ ءتارتىبىن دە، مولشەرىن دە جەرگىلىكتى اكىمدىك ءوزى بەلگىلەيدى.

- ياعني، اكىمدىك ءماسليحات تالقىلاۋىنا شىعارىپ، سولاردىڭ كەلىسىمى بويىنشا شەشىم قابىلدايدى. «ءبىزدىڭ اۋداندا زاڭسىز قوقىس توگەتىندەر كوبەيىپ كەتتى. سولاردىڭ ارەكەتىن حابارلاعانداردى سىياقى نەمەسە اۆتوبۋسپەن تەگىن ءجۇرۋ سياقتى شارامەن ىنتالاندىرايىق» دەپ ۇسىنىس تاستاي الادى. نەگە سولاي ەتپەسكە؟ ونسىز دا ارەكەت يەسىن انىقتاۋ وڭاي بولاتىن قۇقىق بۇزۋ تۇرلەرى بۇل ساناتقا ەنبەيدى دەپ ويلايمىن. مەنىڭ پايىمداۋىمشا، بۇل جۇيەلى تۇردە ەمەس ءبىر رەتتىك شارا بولۋى كەرەك. ءبىراق، زاڭ جوباسى بۇگىن ءبىرىنشى رەت تالقىلانىپ جاتىر. سوندىقتان وسى باپ مىندەتتى تۇردە زاڭعا ەنەدى دەپ ايتا المايمىن، - دەدى يگور لەپەحا.

اۆتور

ەسىمجان ناقتىباي