يزرايلدىڭ ا ق ش- تاعى ەلشىسى يەحيەل لەيتەردىڭ ۇلى، يزرايل ارمياسىنىڭ رەزەرۆىندە تۇرعان نەريا لەيتەر سارسەنبى كۇنى باتىس جاعالاۋداعى باقىلاۋ-وتكىزۋ بەكەتىندە بولعان كولىك تەراكتىسى سالدارىنان اۋىر جاراقات الدى، دەپ حابارلادى The Times of Israel اسكەري جانە پوليتسيا قىزمەتكەرلەرىنە سىلتەمە جاساي وتىرىپ.
يزرايل تاراپىنىڭ مالىمەتىنشە، يەرۋساليم مەن تەل-اۆيۆتى بايلانىستىراتىن 443-تاس جول ماڭىنداعى باقىلاۋ-وتكىزۋ بەكەتىندە پالەستينالىق جۇرگىزۋشى كولىگىن پوليتسيا كولىگىنە قاراي بۇرعان. كولىك سوقتىعىسىنان پوليتسيا قىزمەتكەرىمەن بىرگە كەزەكشىلىك اتقارىپ تۇرعان لەيتەر جاراقات العان.
اسكەريلەر جۇرگىزۋشى قاشۋعا تىرىسقان كەزدە اتىپ ولتىرگەن. پالەستينا دەنساۋلىق ساقتاۋ مينيسترلىگىنىڭ دەرەگىنشە، ونىڭ اتى ماحمۇد سۇلەيمەن بولعان. يزرايل قاۋىپسىزدىك قىزمەتكەرلەرى 29 جاستاعى ەر ادامنىڭ جاقىن ماڭداعى بەيت-ۋر-ءات-تاحتا اۋىلىندا تۇرعانىن حابارلادى.
ەس-ءتۇسسىز جاتقان نەريا لەيتەر يەرۋساليمدەگى «شاارەي-تسەدەك» مەديتسينالىق ورتالىعىنا جەتكىزىلگەن. دارىگەرلەر بىرنەشە ساعات بويى ونىڭ ميىنا جەدەل وتا جاساعان. تراۆماتولوگيا ءبولىمىنىڭ مەڭگەرۋشىسى الون شۆارتس ناۋقاستىڭ جاعدايى تۇراقتانعانىن، ءبىراق اۋىر كۇيىندە قالىپ وتىرعانىن جانە ومىرىنە ءالى دە قاۋىپ ءتونىپ تۇرعانىن حابارلادى. ول باسىنان قاتتى جاراقات العان.
- مەديتسينا ماماندارى قازىر ۇلىمنىڭ ءومىرى ءۇشىن كۇرەسىپ جاتىر… نەريا عاجايىپقا مۇقتاج، - دەپ جازدى ەلشى يەحيەل لەيتەر الەۋمەتتىك جەلىدە.
نەريانىڭ اعاسى، رەزەرۆتەگى موشە يەديديا 2023-جىلدىڭ قاراشاسىندا گازا سەكتورىنىڭ سولتۇستىگىندەگى شايقاس كەزىندە قازا تاپقان بولاتىن.
يزرايل پرەمەر-ءمينيسترى بينيامين نەتانياحۋ ب ۇ ۇ باس اسسامبلەياسىنا قاتىسۋ ءۇشىن نيۋ-يورككە ۇشار الدىندا اۋرۋحاناداعى لەيتەر وتباسىنا باردى.
بىرنەشە كۇن بۇرىن راماللا قالاسىنىڭ سولتۇستىك-باتىسىندا ورنالاسقان، نيەۆە-تسۋف نەمەسە حالاميش دەپ تە اتالاتىن يزرايل ەلدى مەكەنى ماڭىندا دا تەراكت بولعان ەدى.