يزرايلدىڭ ليۆانعا شابۋىلىنان قازا تاپقاندار سانى 560 قا جۋىقتادى

استانا. KAZINFORM - ليۆان بيلىگىنىڭ حابارلاۋىنشا، دۇيسەنبىدەن بەرى يزرايلدىڭ بۇكىل ەلگە جاساعان اۋە شابۋىلدارىندا كەم دەگەندە 558 ادام، ونىڭ ىشىندە 50 بالا مەن 94 ايەل كوز جۇمدى، 1800 دەن استام ادام جارالانعان.

بۇل كۇن ليۆانداعى 1975-1990-جىلدارداعى ازاماتتىق سوعىس اياقتالعاننان بەرگى ەڭ قاندى كۇن بولدى، دەپ جازادى BBC.

يزرايل بيلىگى يران قولدايتىن جانە ءيزرايلدىڭ سولتۇستىگىنە ۇنەمى شابۋىل جاساعان ليۆاندىق «حەزبوللا» توبىنىڭ ينفراقۇرىلىمى مەن جاۋىنگەرلەرىن نىساناعا العانىن ايتادى.

«حەزبوللا» سەيسەنبى كۇنى تاڭەرتەڭ يزرايلگە ونداعان زىمىران اتقىلاعان. كوبىسى قورعانىس ناتيجەسىندە اۋادا جارىلدى، ءبىراق كەيبىر عيماراتتار زاقىمداندى»، - دەيدى يزرايل قورعانىس ارمياسى (تساحال).

يزرايل اسكەرى دۇيسەنبى كۇنى ليۆانعا 1600 دەن استام سوققى جاساعانىن حابارلادى. شابۋىلدار نەگىزىنەن وڭتۇستىكتە بولعان، ءبىراق ولاردىڭ كەيبىرەۋلەرى ەلدىڭ شىعىس جانە سولتۇستىك-شىعىس ايماقتارىندا ورىن العان.

يزرايل تەك «حەزبوللا» نىسانالارىنا عانا سوققى بەرگەنىن ايتىپ جاتىر، ءبىراق ليۆان بيلىگى نىسانالاردىڭ كوپشىلىگى تۇرعىن ءۇي ينفراقۇرىلىمى بولعانىن مالىمدەگەن.

«حەزبوللا» مەن يزرايل اراسىنداعى سوققى الماسۋ سەيسەنبىدە دە جالعاستى.

كەيبىر حالىقارالىق اۋە كومپانيالارى جولاۋشىلار قاۋىپسىزدىگىنە بايلانىستى بەيرۋتقا رەيستەردى توقتاتتى. كەيىنىرەك ايماقتاعى شيەلەنىستىڭ كۇشەيۋىنە بايلانىستى تەل-اۆيۆكە كەيبىر رەيستەردىڭ توقتاتىلعانى بەلگىلى بولدى.

ايتا كەتەيىك، بۇعان دەيىن ليۆان ءيزرايلدىڭ حەزبوللاعا قارسى اۋە شابۋىلىنان 274 ادام قازا تاپقانىن حابارلاعان ەدى.

ا ق ش تاياۋ شىعىستاعى اسكەري كونتينگەنتىن كوبەيتتى.