يزرايل يراننىڭ يادرولىق نەمەسە مۇناي نىساندارىنا شابۋىل جاسامايدى

استانا. KAZINFORM - يزرايل اق ءۇيدى يرانعا قارسى جوسپارلانعان جاۋاپ رەتىندەگى سوققى يادرولىق نەمەسە مۇناي نىساندارىنا باعىتتالمايتىنىنا، ا ق ش- تاعى سايلاۋعا اسەر ەتپەۋ ءۇشىن اسكەري ارەكەتتەرمەن شەكتەلەتىنىنە سەندىردى.

بۇل تۋرالى Washington Post جاعدايمەن تانىس شەنەۋنىكتەرگە سىلتەمە جاساپ حابارلادى.

يزرايلدىڭ شابۋىلدى تەك اسكەري ارەكەتتەرمەن شەكتەۋ تۋرالى ۋادەسى وتكەن اپتادا ا ق ش پرەزيدەنتى دجو بايدەن مەن نەتانياحۋ اراسىنداعى تەلەفون ارقىلى سويلەسۋدە، سونداي-اق ا ق ش قورعانىس ءمينيسترى للويد وستين مەن ونىڭ يزرايلدىك ارىپتەسى يواۆ گاللانتتىڭ جاقىندا بولعان سۇحباتىندا دا ايتىلدى.

يران 1-قازاندا «حەزبوللانىڭ» باس حاتشىسى حاسان ناسراللا ولتىرىلگەنى ءۇشىن ەلگە 200 گە جۋىق بالليستيكالىق زىمىران جىبەرگەننەن كەيىن تاياۋ شىعىس بىرنەشە اپتا بويى يزرايلدىڭ ۋادە ەتكەن جاۋاپ قايتارۋ سوققىسىنا جوعارى دايىندىقتا بولدى.

ا ق ش يزرايلدىڭ جاۋاپ قايتارۋ جوسپارىن تەجەۋگە تىرىستى، ويتكەنى بۇل ايماقتاعى باسقا ەلدەردى تارتاتىن اۋقىمدى سوعىس تۋدىرۋى مۇمكىن.

بۇعان دەيىن يزرايل يراننىڭ مۇناي ينفراقۇرىلىمىنا نەمەسە يادرولىق نىساندارىنا سوققى بەرۋ ويىن قايتا قاراستىرادى دەپ ەسەپتەلدى. ال ا ق ش بۇل ەكى نۇسقاعا دا قارسىلىق ءبىلدىردى. ويتكەنى ول سوعىس قيمىلدارىنىڭ كۇشەيۋىنە، سونىڭ ىشىندە يزرايلدەگى نەمەسە باتىسپەن بايلانىستى باسقا ايماقتارداعى ازاماتتىق ينفراقۇرىلىمدى نىساناعا العان يراننىڭ كەك الۋ ارەكەتىنە اكەلۋى مۇمكىن.

يزرايلدىڭ جاۋابى «ا ق ش سايلاۋىنا ساياسي ارالاسۋدى» بولدىرماۋعا باعىتتالادى. مۇناي ينفراقۇرىلىمىنا شابۋىل ەنەرگيا باعاسىنىڭ وسۋىنە اكەلۋى مۇمكىن. ال يادرولىق نىسانعا سوققى بەرۋ سوعىس قيمىلدارىنىڭ اۋقىمىن كەڭەيتىپ، ا ق ش- تىڭ ارالاسۋىنا اكەلۋى مۇمكىن. بۇل ناتيجەلەردىڭ كەز كەلگەنىن قولدامايتىن امەريكالىق سايلاۋشىلار نارازىلىق ءبىلدىرىپ، جاپپاي دەموكراتيالىق پارتيادان ا ق ش ۆيتسە-پرەزيدەنتى كامالا حارريسكە زيانىن تيگىزىپ، رەسپۋبليكاشىل دونالد ترامپتى قولداۋى مۇمكىن.

دۇيسەنبى كۇنى كەشكە يزرايل پرەمەر-ءمينيسترىنىڭ كەڭسەسى ەلدىڭ قاۋىپسىزدىگى باسقالاردان جوعارى ەكەنىن مالىمدەدى.

«ءبىز امەريكا ۇكىمەتىنىڭ پىكىرىن تىڭدايمىز، ءبىراق سوڭعى شەشىمدى يزرايلدىڭ ۇلتتىق قاۋىپسىزدىگىنىڭ قاجەتتىلىكتەرىنە قاراي قابىلدايمىز»، - دەدى پرەمەر-مينيستر مالىمدەمەسىندە.

ا ق ش پەن يزرايل بينيامين نەتانياحۋ مەن دجو بايدەننىڭ سارسەنبى كۇنگى تەلەفون ارقىلى سويلەسۋىنەن كەيىن تاياۋ شىعىستاعى ستراتەگيالىق ماسەلەلەرگە قاتىستى ورتاق پىكىرگە كەلگەنىن جازعان بولاتىنبىز.