يزرايل يراننىڭ اراكتاعى يادرولىق رەاكتورىنا شابۋىل جاسادى

استانا. KAZINFORM - يزرايل اسكەري-اۋە كۇشتەرى يراننىڭ يادرولىق باعدارلاماسىنداعى نەگىزگى نىسان سانالاتىن اراكتاعى اۋىر سۋ رەاكتورىنا اۋەدەن سوققى بەردى، دەپ حابارلايدى Kazinform ءتىلشىسى.

يران اقپارات قۇرالدارىنىڭ حابارلاۋىنشا، شابۋىل بۇرىن «اراك رەاكتورى» دەپ اتالعان زەرتتەۋ كەشەنى ورنالاسقان ماركازي پروۆينتسياسىنىڭ حونداب اۋدانىنا جاسالعان.

ISNA اگەنتتىگىنىڭ حابارلاۋىنشا، نىسان قىزمەتكەرلەرى شابۋىلدان بۇرىن ەۆاكۋاتسيالانعان جانە رادياتسيا الۋ قاۋپى جوق.

يزرايل قورعانىس كۇشتەرى اۋە شابۋىلىن راستاپ، پلۋتوني وندىرىسىنە قاتىساتىن، رەاكتوردى وقشاۋلايتىن كەمەنىڭ قۇرامداس بولىگى نىساناعا الىنعانىن ايتتى. اسكەريلەر سونىمەن قاتار ناتانزداعى «يادرولىق قارۋ ازىرلەۋ ورتالىعى» رەتىندە سيپاتتالعان نىسانعا جانە بالليستيكالىق زىمىران كومپونەنتتەرىن شىعاراتىن نىسانعا سوققى بەرگەنىن ايتتى.

شابۋىلدان بىرنەشە ساعات بۇرىن يزرايل اسكەريلەرى اراك پەن حونداب تۇرعىندارىنا ەسكەرتۋ جاساپ، ولاردى تەز ارادا ۇيلەرىن تاستاپ كەتۋگە شاقىردى. يزرايل بۇل ايماقتا يراننىڭ ماڭىزدى اسكەري ينفراقۇرىلىمى بار ەكەنىن ايتادى.

قۇرىلىسى 2000 -جىلداردىڭ باسىندا باستالعان IR-40 رەاكتورى ماگاتە، ا ق ش جانە ە و اراسىندا بىرنەشە رەت الاڭداۋشىلىق تۋدىردى. ول پايدالاناتىن اۋىر سۋ يادرولىق قارۋعا جارامدى پلۋتوني شىعارادى.

2015 -جىلعى يادرولىق كەلىسىمگە (JCPOA) سايكەس يران رەاكتوردى بەيبىت ماقساتتا قايتا قۇرۋعا جانە پلۋتوني ءوندىرىسىن شەكتەۋگە مىندەتتەمە الدى. الايدا 2018 -جىلى ا ق ش كەلىسىمنەن شىققاننان كەيىن تەگەران ءوزىنىڭ بۇرىنعى يادرولىق ازىرلەمەلەرىنىڭ كەيبىرىنە قايتا ورالاتىنىن جاريالادى. سوڭعى اقپاراتقا سايكەس، يران بيلىگى ماگاتە- گە رەاكتوردى كەلەسى جىلى ىسكە قوسۋ نيەتى تۋرالى حابارلاعان.

اتوم ەنەرگياسى جونىندەگى حالىقارالىق اگەنتتىك (ماگاتە) اراكتاعى رەاكتوردىڭ زاقىمدالعانىن راستادى، ال ۇيىمدا اۋىر سۋ وندىرەتىن زاۋىتتىڭ زاقىمدانۋى تۋرالى اقپارات جوق.

ماگاتە رەاكتوردىڭ جۇمىس ىستەمەيتىنىن جانە قۇرامىندا يادرولىق ماتەريالداردىڭ جوقتىعىن، سوندىقتان راديولوگيالىق زارداپتاردىڭ بولماعانىن حابارلادى.

ماگاتە بۇعان دەيىن دە يزرايلدى يادرولىق نىساندارعا سوققى بەرۋدەن باس تارتۋعا شاقىرىپ، ءوزى تەكسەرەتىن نىسانداردىڭ قاۋىپسىزدىگىن قامتاماسىز ەتۋدىڭ ماڭىزدىلىعىن اتاپ وتكەن.

بەيسەنبىگە قاراعان ءتۇنى تاراپتار اراسىنداعى سوققىلار كەزىندە تەگەران، كارادج، يەرۋساليم جانە تەل-اۆيۆتە دە جارىلىستار بولدى. يراننىڭ زىمىران شابۋىلى سالدارىنان يزرايلدە كەم دەگەندە ءتورت نىسان زاقىمداندى.

بۇدان بۇرىن ماگاتە- ءنىڭ باس ديرەكتورى رافاەل گروسسي يراننىڭ جۇيەلى تۇردە يادرولىق قارۋ جاساپ جاتقانىنا ەشقانداي دالەل جوق دەپ مالىمدەگەن.

وسىعان دەيىن يراننىڭ بالليستيكالىق زىمىرانى يزرايل اۋرۋحاناسىنا تۇسكەنى تۋرالى جازدىق.

اۆتور

ەركەجان سماعۇلوۆا