يزرايل وپپوزيتسياسى نەتانياحۋمەن بىرلەسكەن ۇكىمەت قۇرۋدان باس تارتتى

پارتيا وكىلدەرى يزرايل پرەزيدەنتى يتسحاك گەرتسوگكە جۇگىنىپ، بۇرىنعى باس شتاب باستىعى گادي ايزەنكوتقا جاڭا ۇكىمەت جاساقتاۋدى تاپسىرۋدى سۇراماق.

Anadolu اگەنتتىگىنىڭ The Times of Israel باسىلىمىنا سىلتەمە جاساپ حابارلاۋىنشا، «ياشار» دەلەگاتسياسى ەل پرەزيدەنتىمەن كەڭەس وتكىزىپ، ۇكىمەتتى تەزىرەك جاساقتاۋ قاجەت ەكەنىن ايتقان.

دەپۋتات وريت فاركاش- حاكوەن نەتانياحۋدى قوعام بىرلىگىنە كەدەرگى كەلتىرىپ وتىرعان نەگىزگى تۇلعا دەپ اتادى. ونىڭ سوزىنشە، پرەمەر-ءمينيستردىڭ ارەكەتتەرى ەلدەگى ساياسي جىكتەلۋدى كۇشەيتكەن.

پارتيا وكىلى يورام كوەن وپپوزيتسيا الدىمەن ءوز وداقتاستارىمەن كەلىسسوز جۇرگىزەتىنىن، سودان كەيىن ورتاق ۇستانىمداردى قولدايتىن وزگە ساياسي كۇشتەردى تارتۋعا نيەتتى ەكەنىن مالىمدەدى.

باسىلىمنىڭ مالىمەتىنشە، يزرايل ازاماتتارى اراسىنداعى پالەستينالىقتاردىڭ مۇددەسىن قورعايتىن پارتيالار ايزەنكوتتىڭ كانديداتۋراسىن قولداعاننان كەيىن ونىڭ ۇكىمەتىن قولداۋعا دايىن دەپۋتاتتار سانى 67 گە جەتكەن. ال نەتانياحۋدى 46 پارلامەنت مۇشەسى قولدايدى.

بۇعان دەيىن 27-قازاندا وتكەن پارلامەنت سايلاۋىنىڭ قورىتىندىسى بويىنشا يزرايلدەگى ساياسي بلوكتاردىڭ ەشقايسىسى ۇكىمەتتى ءوز بەتىنشە جاساقتاۋعا جەتكىلىكتى باسىمدىققا يە بولماعانى حابارلانعان ەدى. نەتانياحۋ بلوگى 53 ماندات، وپپوزيتسيالىق بلوك 48 ماندات، ال اراب پارتيالارى 19 ماندات يەلەنگەن.