دۇيسەنبى كۇنى يزرايل كۇشتەرى شىعىس يەرۋساليمنىڭ سولتۇستىك-باتىسىندا ورنالاسقان بيددۋ ەلدى مەكەنىندە ءجۇرىپ جاتقان اۋقىمدى رەيدتى جالعاستىردى. وپەراتسيا بارىسىندا كەمىندە 53 پالەستينالىق ۇستالدى. بۇل تۋرالى Anadolu اگەنتتىگى يەرۋساليم پروۆينتسياسى بيلىگىنىڭ دەرەگىنە سىلتەمە جاساپ حابارلادى.
پالەستينا تاراپىنىڭ مالىمەتىنشە، يزرايل اسكەري قىزمەتشىلەرى ۇيلەردى ءتىنتىپ، جەرگىلىكتى تۇرعىنداردان جاۋاپ الىپ جاتىر. بيددۋ مەرى نازمي مانسۋر Al Jazeera تەلەارناسىنا بەرگەن سۇحباتىندا بىرنەشە ۇيدە ونداعان جاس جىگىت ۇستالىپ، جاۋاپقا تارتىلىپ جاتقانىن ايتتى.
ول رەيد كەزىندە مۇلىككە زاقىم كەلگەنىن جانە كۇش قولدانۋ جاعدايلارى بولعانىن دا مالىمدەدى. قالاداعى مەكتەپتەر جابىلىپ، تۇرعىندار ۇيلەرىنەن شىقپاي وتىر.
وپەراتسيا 20-قىركۇيەك كۇنى تاڭەرتەڭ راماللا قالاسىنىڭ سولتۇستىك-باتىسىندا ورنالاسقان، نيەۆە-تسۋف نەمەسە حالاميش دەپ تە اتالاتىن يزرايل ەلدى مەكەنى ماڭىندا بولعان تەراكتىدەن كەيىن باستالدى.
يزرايل اسكەرى مەن پوليتسياسىنىڭ مالىمەتىنشە، قارۋلى پالەستينالىق ازامات بۇلاق ماڭىندا جۇرگەن يزرايلدىكتەرگە كولىكتىڭ ىشىنەن وق اتقان. ءبىر ەر ادام اۋىر جارالانىپ، كەيىن اۋرۋحانادا كوز جۇمدى.
شابۋىل جاسادى دەگەن كۇدىكتى 37 جاستاعى بيددۋ تۇرعىنى قۋعىن كەزىندە جاراقات الدى. بىرنەشە ساعاتتان سوڭ يزرايلدىڭ «دۋۆديەۆان» ارنايى بولىمشەسىنىڭ ساربازدارى ونى راماللا ماڭىنداعى اۋرۋحانادا ۇستادى. سونىمەن قاتار اسكەريلەر شابۋىل كەزىندە قولدانىلۋى مۇمكىن قارۋدىڭ تابىلعانىن حابارلادى.
تەراكتىدەن كەيىن يزرايل پرەمەر-ءمينيسترى بينيامين نەتانياحۋ كۇشتىك قۇرىلىمدارعا باتىس جاعالاۋداعى اسكەري كۇشتەردى كۇشەيتۋدى، ۇستاۋ وپەراتسيالارىن جۇرگىزۋدى جانە شابۋىلداۋ ارەكەتتەرىن كەڭەيتۋدى تاپسىردى.
يزرايل ارمياسى بيددۋدە ونداعان رەيد جۇرگىزىلىپ، بريگادا دەڭگەيىندەگى وپەراتسيا وتكىزىلگەنىن حابارلادى. سونداي-اق شابۋىل جاسادى دەگەن كۇدىكتىنىڭ ءۇيىن جوسپارلى تۇردە بۇزۋعا الدىن الا دايىنداعانىن مالىمدەدى.
وسىعان دەيىن ريمدە وتەتىن يزرايل مەن ليۆان كەلىسسوزدەرى قازانعا شەگەرىلگەنى تۋرالى جازدىق.