يزرايل پرەمەرى ب. نەتانياحۋ د. بايدەنمەن كەزدەستى

استانا. قازاقپارات- يزرايل پرەمەر- ءمينيسترى ا ق ش استاناسىنا ساپارلاپ، پرەزيدەنت دجو بايدەن جانە ۆيتسە- پرەزيدەنت كامالا حارريسپەن كەزدەستى، دەپ حابارلايدى 24KZ.

ۆاشينگتوندا وتكەن باسقوسۋدا تالقىلانعان باستى ماسەلە - تاياۋ شىعىستاعى احۋال. ا ق ش پرەزيدەنتى دجو بايدەن مەن يزرايل ۇكىمەت باسشىسى بينيامين نەتانياحۋدىڭ كەزدەسۋى اق ۇيدە ءوتتى.

قوس ەل باسشىسى مەديا وكىلدەرىنىڭ الدىنا شىعىپ امانداسقان سوڭ كەلىسسوزدى جابىق فورماتتا جالعاستىردى. باسقوسۋدا باستى تاقىرىپ تاياۋ شىعىستاعى قاقتىعىس بولدى. ا ق ش يزرايلگە بىتىمگەرشىلىك كەلىسىمدى قابىل الۋ كەرەكتىگىن العا تارتقان. دەگەنمەن بۇقارالىق اقپارات قۇرالدارىنىڭ نازارى بينيامين نەتانياحۋ مەن ا ق ش ۆيتسە- پرەزيدەنتى كامالا حارريستىڭ كەزدەسۋىندە بولدى.

«سەبەبى امەريكادا سايلاۋالدى ناۋقان ءجۇرىپ جاتقاندىقتان، حارريستىڭ پرەزيدەنتتىككە ۇمىتكەر رەتىندە گازاداعى سوعىسقا قاتىستى ۇستانىمىن ءبىلۋ سايلاۋشىلار ءۇشىن وتە ماڭىزدى»، - دەيدى ساراپشىلار.

كامالا حارريس، ا ق ش ۆيتسە- پرەزيدەنتى:

- سوڭعى 9 ايدا گازادا بولعان وقيعالار جانتۇرشىگەرلىك دەپ ويلايمىن. بۇل قايعىلى جاعدايلارعا كوز جۇمىپ قاراپ وتىرۋ مۇمكىن ەمەس. مۇنداي زورلىق- زومبىلىققا جول بەرىلمەۋ كەرەك جانە مەن ءۇنسىز قالمايمىن.

نەتانياحۋدىڭ ا ق ش كونگرەسىندەگى سويلەگەن ءسوزىن سىنعا الىپ جاتقاندار دا كوپ.

«يزرايل پرەمەرىنىڭ گازاعا كۇنىنە 40 مىڭ توننا گۋمانيتارلىق جۇك جەتكىزىلىپ، رافاحتاعى اسكەري وپەراتسيادان قازا تاۋىپ جاتقان بەيبىت تۇرعىن از دەپ مالىمدەۋى شىندىققا جاناسپايدى»، - دەيدى گۋمانيتارلىق ۇيىم وكىلدەرى مەن ساراپشىلار.

حاليد ەلدجيندي، تاياۋ شىعىس ينستيتۋتىنىڭ زەرتتەۋشىسى:

- نەتانياحۋ بىتىمگەرشىلىك تۋرالى مۇلدەم ءتىل قاتپادى. پرەزيدەنت بايدەن مەن ونىڭ اكىمشىلىگىنىڭ وكىلدەرى بۇل ماسەلەنى تالاي مارتە كوتەردى. ال كامالا حارريسكە كەلەتىن بولساق، ونىڭ يزرايلگە قاتىستى ۇستانىمى وزگەشە دەپ ويلايمىن.

ا ق ش پەن يزرايل باسشىلارىنىڭ كەزدەسۋىنە نارازىلىق بىلدىرگەن امەريكالىقتار دا از ەمەس. اق ءۇي الدىنا جينالعان حالىقتىڭ دەنى پالەستيناداعى قۇربانداردى ەسكە الىپ، يزرايل ۇكىمەتىنىڭ 9 اي بويى جاساپ كەلگەن ارەكەتىن سىنعا الدى. ماسەلەن، گازا دەنساۋلىق ساقتاۋ مينيسترلىگىنىڭ مالىمەتىنشە، 7 -قازاننان بەرى يزرايل اسكەرىنىڭ سوققىلارىنان 39 مىڭنان اسا پالەستينالىق قازا تاۋىپ، 90 مىڭ تۇرعىن جارالانعان. قازىر نەتانياحۋدىڭ ساپارى جالعاسىپ جاتىر.