يزرايل پرەمەر-ءمينيسترى نيۋ-يورككە بارۋدى جوسپارلاپ وتىر

نيۋ- يورك. KAZINFORM – ا ق ش- تىڭ دەموكراتيالىق پارتياسىنان قالالىق مەر قىزمەتىنە ۇمىتكەر زوحران مامداني حالىقارالىق قىلمىستىق سوت (ح ق س) شىعارعان وردەرگە سۇيەنە وتىرىپ، بينيامين نەتانياحۋدى قاماۋعا الۋعا ۋادە ەتكەن، دەپ جازادى Anadolu.

- مەن نيۋ-يورككە پرەزيدەنت ترامپپەن بىرگە بارامىن، - دەدى نەتانياحۋ مامداني مالىمدەمەسىنە جاۋاپ رەتىندە.

جانىندا تۇرعان دونالد ترامپ يزرايلدىك ۇكىمەت باسشىسىن قولدادى. اق ءۇي باسشىسى سايلاۋداعى جەڭىس تاۋەلسىز شەشىم قابىلداۋعا كەپىل ەمەس ەكەنىن ەسكە سالدى.

- وعان ءبارىبىر اقشا كەرەك بولادى. ءبارى اق ءۇي ارقىلى ىسكە اسادى. سوندىقتان ءوزىن دۇرىس ۇستاعانى ءجون، ايتپەسە قيىن بولادى، - دەدى ترامپ.

بۇعان دەيىن مامداني دەموكراتيالىق پارتيانىڭ الدىن الا سايلاۋىندا جەڭىسكە جەتىپ، نيۋ-يورك مەرىن سايلاۋ جارىسىنا قاتىساتىنى بەلگىلى بولعان. سايلاۋ 4-قاراشادا وتەدى. ەگەر جەڭىسكە جەتسە، ول قالا تاريحىنداعى مۇسىلمان دىنىندەگى جانە وڭتۇستىك ازيادان شىققان العاشقى مەر اتانۋى مۇمكىن.

2024-جىلعى تەلەباعدارلامالاردىڭ بىرىندە مامداني ەگەر مەر بولسا، نەتانياحۋدى قاماۋعا الاتىنىن ايتقان.

- نيۋ-يورك - حالىقارالىق قۇقىق قۇندىلىقتارىن قولدايتىن قالا. ەندى وسى قۇندىلىقتارعا ساي ارەكەت ەتەتىن ۋاقىت جەتتى، - دەگەن ول.

ا ق ش ح ق س- تىڭ مۇشەسى ەمەس ەكەنىن ەسكە سالعاندارعا مامداني فەدەرالدىق دەڭگەيدە جەتىسپەيتىن كوشباسشىلىقتى جەرگىلىكتى دەڭگەيدە كورسەتۋ ماڭىزدى ەكەنىن ايتقان.

ايتا كەتەيىك، مامىر ايىندا حالىقارالىق قىلمىستىق سوت يزرايل پرەمەر-ءمينيسترى بينيامين نەتانياحۋ مەن ەلدىڭ قورعانىس مينيسترىنە قاماۋعا الۋ تۋرالى وردەر شىعارعان. ولار گازا سەكتورىندا اسكەري قىلمىستار جاسادى دەپ ايىپتالىپ وتىر. الايدا يزرايل مەن ا ق ش ح ق س- تىڭ يۋريسديكتسياسىن مويىندامايدى.

ايتا كەتەيىك، بۇعان دەيىن ا ق ش- تا نەتانياحۋدىڭ ساپارىنا قارسى نارازىلىق اكسياسى وتكەنىن جازدىق.