يزرايل مەن يران اراسىنداعى شيەلەنىس: تۇركيا رەيستەر باعىتىن وزگەرتتى

استانا. KAZINFORM - يزرايلدىڭ يرانعا سوققىسىنان كەيىن تۇركيا قاۋىپتى ايماقتاردى اينالىپ وتەتىن جاڭا ۇشۋ باعىتتارىن ەنگىزدى، دەپ جازادى انادولى.

يزرايلدىڭ يرانعا جاساعان اۋە سوققىلارىنان كەيىن تۇرىك اۋە كومپانيالارى قاۋىپسىزدىك ماقساتىندا ءتيىستى ساقتىق شارالارىن قابىلدادى، اتاپ ايتقاندا ۇشۋ باعىتتارى قاۋىپتى ايماقتاردى اينالىپ ءوتۋ ءۇشىن قايتا رەتتەلدى. بۇل تۋرالى تۇركيانىڭ كولىك جانە ينفراقۇرىلىم ءمينيسترى ابدۋلكادير ۋرالوعلۋ الەۋمەتتىك جەلىدە حابارلادى.

ءمينيستردىڭ مالىمدەۋىنشە، يزرايل، يران، سيريا جانە يراكتىڭ اۋە كەڭىستىگى يزرايلدىڭ جاساعان سوققىلارى مەن ايماقتاعى قاۋىپسىزدىككە تونگەن قاتەردىڭ ارتۋىنا بايلانىستى ۋاقىتشا جابىلدى.

مينيستر ناقتىلاپ وتكەندەي، يزرايل، تەگەران جانە باعداد ۇستىندەگى اۋە كەڭىستىكتەرى ارنايى جاريالانعان حابارلامالار (NOTAM) اياسىندا جابىلادى.

- وقيعالاردىڭ دامۋىنا بايلانىستى ءبىزدىڭ ازاماتتىق اۆياتسيا باس باسقارمامىز جانە ءتيىستى اۋە كومپانيالارى بارلىق قاجەتتى شارانى قابىلدادى. ۇشۋ باعىتتارى قاۋىپتى ايماقتاردان اينالىپ وتەتىندەي قايتا جوسپارلاندى. جولاۋشىلار مەن ەكيپاجدىڭ قاۋىپسىزدىگى - باستى باسىمدىق. داعدارىس شتابىنىڭ جۇمىسى جالعاسىپ جاتىر. Turkish Airlines باستاعان اۋە كومپانيالارى 16-ماۋسىم، دۇيسەنبىگە دەيىن يران، يراك، سيريا جانە يوردانيا باعىتىنداعى رەيستەرىن توقتاتتى، - دەدى مينيستر.

ەسكە سالايىق، جۇماعا قاراعان ءتۇنى يزرايل يران اۋماعىنا جاپپاي سوققى جاسادى. بۇل شابۋىلدىڭ سالدارىنان يسلام ريەۆوليۋتسياسى ساقشىلار كورپۋسىنىڭ (ك س ي ر) ءبىرقاتار جوعارى لاۋازىمدى كومانديرلەرى مەن يادرولىق فيزيكا سالاسىنداعى عالىمدار قازا تاپتى. يران سونداي-اق ناتانز قالاسىنداعى يادرولىق نىساننىڭ زاقىمدانعانىن راستادى، ءبىراق رادياتسيانىڭ تارالۋ فاكتىسىن جوققا شىعاردى.

سونداي-اق يران يزرايلگە زىمىران اتىپ، ەلدە اۋە دابىلى جاريالانعانىن جازعانبىز.