يزرايل مەن حاماس قاقتىعىسىندا 31 جۋرناليست مەرت بولدى

 امەريكانىڭ جۋرناليستەردى قورعاۋ كوميتەتى 31-قازانداعى جاعداي بويىنشا 31 جۋرناليست جانە ب ا ق قىزمەتكەرى يزرايل مەن حاماس قاقتىعىسىنىڭ قۇربانى بولدى دەپ مالىمدەدى. Kazinform بۇل تۋرالى cpj.org سايتىنا سىلتەمە جاساپ حابارلايدى. 

كوميتەت جۋرناليستەر تۋرالى بارلىق اقپاراتتى - قازا تاپقان، جارالانعان، تۇتقىنعا الىنعان نەمەسە قاقتىعىس كەزىندە ءىز- ءتۇزسىز جوعالىپ كەتكەندەر تۋرالى، سونداي-اق سوعىس قيمىلدارىنىڭ كورشىلەس ليۆانعا تاراپ كەتۋىنەن زارداپ شەككەندەردى زەرتتەپ جاتىر. كوميتەتتىڭ الدىن الا تەرگەۋى جانجال باستالعالى، ياعني 7-قازاننان بەرى ەكى تاراپتا ولتىرىلگەن 9000 نان استام ادامنىڭ 31 ى جۋرناليست جانە ب ا ق قىزمەتكەرى ەكەنىن كورسەتتى.

27-قازاندا Reuters اگەنتتىگى جۋرناليستەرى يزرايلدىك سوققى نىسانىنا اينالمايتىنىنا كەپىلدىك سۇرادى. يزرايل قورعانىس اسكەرى (س ا ح ا ل) Reuters جانە Agence France Press اقپارات اگەنتتىكتەرىنە جاۋاپ رەتىندە گازا سەكتورىندا جۇمىس ىستەيتىن جۋرناليستەردىڭ قاۋىپسىزدىگىنە جاۋاپ بەرە المايتىنىن ءمالىم ەتتى.

يزرايل گازا قالاسىنا قۇرلىقتان شابۋىل جاساۋعا دايىندالىپ جاتقان ساتتە، يزرايل جويقىن اۋە سوققىلارىن جىبەرىپ، بايلانىس بۇزىلىپ، ەلەكتر ەنەرگياسى ءسونىپ جاتقان كەزدە اقپارات تاراتۋعا تىرىسىپ جاتقان گازا سەكتورىنداعى جۋرناليستەر كۇن سايىن ولىممەن بەتپە-بەت كەلەدى.

31-قازانداعى جاعداي:

31 جۋرناليستىڭ ءولىمى راستالدى: 26 پالەستينالىق، 4 يزرايلدىك جانە بىرەۋى ليۆان ازاماتى.

8 جۋرناليست جارالانعانى، 9 ءتىلشى ءىز-ءتۇزسىز جوعالىپ كەتكەنى نەمەسە تۇتقىنعا الىنعانى حابارلاندى.

سونداي-اق كوميتەت باسقا جۋرناليستەردىڭ ءولىمى، جوعالىپ كەتكەنى، تۇتقىنعا الىنعانى، جارالانعانى نەمەسە قاۋىپ ءتونىپ تۇرعانى جايلى، ب ا ق كەڭسەلەرى مەن جۋرناليستەر ۇيىنە زاقىم كەلگەنى تۋرالى اقپاراتتاردى تەكسەرىپ جاتىر.

«جۋرناليستەر - داعدارىس كەزىندە ماڭىزدى جۇمىس اتقارىپ جاتقان بەيبىت ازاماتتار، ولار قاقتىعىس تاراپتارىنىڭ قۋدالاۋىنا ۇشىراماۋى كەرەك»، - دەدى تاياۋ شىعىس پەن سولتۇستىك افريكا بويىنشا كوميتەت باعدارلامالارىنىڭ ۇيلەستىرۋشىسى شەريف مانسۋر.