يزرايل ليۆانداعى پەيدجەردى بومبالاۋ وپەراتسياسىن دايىنداۋعا 15 جىل جۇمساعان
استانا. KAZINFORM - يزرايل 15 جىل بويى ليۆاندا پەيدجەرلەردى جارۋ وپەراتسياسىن جوسپارلاپ كەلگەن. بۇل تۋرالى ءتۇرلى دەرەككوزدەرگە سىلتەمە جاساعان ABC تەلەارناسى حابارلادى.
ولار ليۆاننىڭ ءارتۇرلى ايماقتارىندا جارىلعان بايلانىس قۇرىلعىلارىن وندىرۋگە ەۆرەي مەملەكەتىنىڭ قاتىسى بار ەكەنىن راستادى. بۇل ءۇشىن يزرايل پەيدجەرلەردى شىعارۋمەن بايلانىستى بىرنەشە الدىڭعى قاتارلى كومپانيالاردى قۇرعان. سونداي-اق، بۇل كاسىپورىنداردىڭ كەيبىر قىزمەتكەرلەرى ناقتى كىمگە جۇمىس ىستەيتىنىن دە بىلمەگەن.
وسى ۇيىمداردىڭ ءبىرى بۋداپەشتتەگى BAC Consulting بولىپ تابىلادى، ول تايۆاننىڭ Gold Apollo برەندىمەن پەيدجەرلەردى شىعارۋعا كەلىسىم-شارتقا وتىرعان، دەپ حابارلايدى ABC. الايدا ماجارستان ۇكىمەتىنىڭ وكىلى تەلەارناعا بۇل قۇرىلعىلاردىڭ ماجارستاندا جوق ەكەنىن جانە BAC Consulting تەك «دەلدال» ەكەنىن جانە ەلدە ەشتەڭە وندىرمەيتىنىن ايتقان.
ABC دەرەككوزدەرى سونداي-اق ا ق ش ورتالىق بارلاۋ اگەنتتىگى مۇنداي وپەراتسيالاردى بەيبىت تۇرعىندار ءۇشىن تىم قاۋىپتى دەپ سانايتىنىن جانە سوندىقتان ءوز وپەراتسيالارىندا مۇنداي تاكتيكادان باس تارتاتىنىن حابارلادى.
ەستەرىڭىزگە سالا كەتەيىك، 17-جانە 18-قىركۇيەكتە ليۆاندا كوپتەگەن بايلانىس قۇرالدارى جارىلىس بولدى. ليۆاننىڭ ءارتۇرلى بولىكتەرىندە كۇن باتارەيالارى مەن ليتي-يوندىق باتارەيالاردان جۇمىس ىستەيتىن تەلەفوندار مەن قۇرىلعىلار جارىلعان.
ليۆان دەنساۋلىق ساقتاۋ مينيسترلىگىنىڭ سوڭعى مالىمەتى بويىنشا، ەلدە سەيسەنبى جانە سارسەنبى كۇندەرى بولعان جارىلىستاردان 37 ادام قازا تاۋىپ، 708 دەن استام ادام جارالانعان.