اتالعان شەشىم تۋرالى ايزەنكوتقا 7-قاراشا كۇنى كەشكە حابارلانعان. يزرايل پرەزيدەنتىنىڭ باسپا ءسوز قىزمەتىنىڭ مالىمەتىنشە، ۇكىمەت قۇرۋ جونىندەگى رەسمي ماندات وعان 8-قاراشادا تابىستالادى.
گەرسوگ بۇل شەشىمدى 27 -قازاندا وتكەن پارلامەنتتىك سايلاۋدان كەيىن ساياسي پارتيالارمەن جۇرگىزىلگەن كونسۋلتاتسيالار ناتيجەسىندە قابىلداعان. «ياشار» پارتياسىنىڭ جەتەكشىسى گادي ايزەنكوتتىڭ كانديداتۋراسىن كنەسسەتتەگى 67 دەپۋتاتتىق ورىنعا يە پارتيالاردىڭ وكىلدەرى قولداعان. ال قازىرگى پرەمەر-مينيستر بينيامين نەتانياحۋدى 46 دەپۋتات قولداعان.
ايزەنكوتقا بيلەۋشى كواليتسيانى جاساقتاۋ ءۇشىن 28 كۇن ۋاقىت بەرىلەدى. قاجەت بولعان جاعدايدا بۇل مەرزىمدى تاعى 14 كۇنگە ۇزارتۋعا مۇمكىندىك بار.
پارلامەنتتە باسىمدىققا يە بولۋ ءۇشىن 120 دەپۋتاتتىڭ كەمىندە 61- ءىنىڭ قولداۋىنا يە بولۋ قاجەت. الايدا سايلاۋ قورىتىندىسى بويىنشا ايزەنكوت باستاعان اليانس 48 ورىنعا، ال نەتانياحۋ بلوگى 53 ورىنعا يە بولعان. قالعان 19 ماندات اراب پارتيالارىنا بۇيىرعان.
ايزەنكوتتىڭ كانديداتۋراسىن ۇسىنۋ كەزىندە اراب پارتيالارىنىڭ ءبىر بولىگى ونى قولداعانىمەن، ساياساتكەر بۇعان دەيىن ولاردىڭ وكىلدەرىن ۇكىمەت قۇرامىنا ەنگىزۋ مۇمكىندىگىن جوققا شىعارعان. سوندىقتان كواليتسيا قۇرۋ ءۇشىن وعان وزگە ساياسي كۇشتەرمەن كەلىسسوز جۇرگىزۋگە تۋرا كەلەدى.
ەگەر ايزەنكوت بەلگىلەنگەن مەرزىمدە ۇكىمەت جاساقتاي الماسا، پرەزيدەنت بۇل مانداتتى باسقا ۇمىتكەرگە تاپسىرا الادى.
ال جاڭا ۇكىمەت جاساقتالعانعا دەيىن بينيامين نەتانياحۋ پرەمەر-مينيستر مىندەتىن اتقارۋدى جالعاستىرادى.
بۇعان دەيىن يزرايلدەگى پارلامەنتتىك سايلاۋ قورىتىندىسى بويىنشا نەگىزگى ساياسي بلوكتاردىڭ ەشقايسىسى ۇكىمەتتى ءوز بەتىنشە جاساقتاۋعا قاجەتتى باسىمدىققا يە بولماعانى حابارلانعان ەدى.