يزرايل گازا وپەراتسياسىن كەڭەيتۋ جوسپارىن ماقۇلدادى
استانا. KAZINFORM - كابينەت بەكىتكەن جوسپارعا «گازا سەكتورىن جاۋلاپ الۋ جانە اۋماقتى باسىپ الۋ» كىرەدى، دەپ حابارلايدى Kazinform ءتىلشىسى.
يزرايل ۇكىمەتىنىڭ اسكەري-ساياسي كابينەتى جەكسەنبى كۇنى گازا سەكتورىنداعى اسكەري وپەراتسيانى كەڭەيتۋ جوسپارىن ءبىراۋىزدان ماقۇلدادى.
يزرايل قورعانىس كۇشتەرى (تساحال) باس شتابىنىڭ باسشىسى گەنەرال-لەيتەنانت ەيال زامير ۇسىنعان جوسپارعا سايكەس، يزرايل ارمياسىنىڭ گازا سەكتورىنداعى اۋماقتى باقىلاۋعا الۋى، بەيبىت تۇرعىنداردى وڭتۇستىككە كوشىرۋ، حاماسقا شابۋىل جاساۋ جانە پالەستينالىق توپتىڭ گۋمانيتارلىق كومەكتى باقىلاۋعا الۋىنا جول بەرمەۋ قاجەت.
يزرايلدىك اقپارات قۇرالدارىنىڭ حابارلاۋىنشا، بۇل جوسپار ا ق ش پرەزيدەنتى دونالد ترامپتىڭ كەلەسى اپتادا تاياۋ شىعىسقا ساپارىنان كەيىن عانا جۇزەگە اسادى. وعان دەيىن حاماسپەن اتىستى توقتاتۋ جانە كەپىلگە الىنعانداردى بوساتۋ تۋرالى كەلىسىمگە كەلۋگە كۇش سالىنادى.
يزرايل تەلەارناسى شەنەۋنىكتەرگە سىلتەمە جاساي وتىرىپ، جاڭا جوسپار بىرتىندەپ جانە بىرنەشە ايعا سوزىلاتىنىن، كۇشتەر باستاپقىدا گازا سەكتورىنىڭ ءبىر ايماعىنا شوعىرلاناتىنىن حابارلادى.
كابينەت قۇرامىنداعى مينيستر زەەۆ ەلكيننىڭ ايتۋىنشا، ۋاقىتشا كەستە ا ق ش پرەزيدەنتى دونالد ترامپتىڭ كەلەسى اپتاداعى ساپارى الدىندا اتىستى توقتاتۋ جانە كەپىلگە الىنعانداردى بوساتۋ تۋرالى كەلىسىمگە مۇمكىندىك بەرەدى.
- ەگەر حاماس ءبىزدىڭ ۇستانىمىمىزدى تۇسىنسە، ترامپتىڭ تاياۋ شىعىسقا ساپارىنا ءالى ۋاقىت بار، - دەدى ەلكين.
گۋمانيتارلىق كومەك جاڭا جولمەن قايتا باستالادى
سونىمەن قاتار، مينيسترلەر كابينەتى گازا سەكتورىنا گۋمانيتارلىق كومەك جەتكىزۋدى قالپىنا كەلتىرۋ جوسپارىن ماقۇلدادى، ءبىراق جەتكىزۋ مەحانيزمى حاماستىڭ ونى ءوز سودىرلارىنا بۇرۋ مۇمكىندىگىن بارىنشا ازايتۋ ءۇشىن قايتا قۇرىلاتىنىن ايتتى.
جوسپارعا قارسى داۋىس بەرگەن جالعىز ادام يزرايلدىڭ ۇلتتىق قاۋىپسىزدىك ءمينيسترى يتامار بەن-گۆير بولدى. جوسپار گازا سەكتورىنداعى جاعداي تالاپ ەتكەندە كۇشىنە ەنەدى.
جاڭا جوسپاردىڭ ءمانى تساحال كومەكتى ورتالىقتاندىرىپ، ونى ساقتاۋدى جانە تاراتۋدى توقتاتىپ، تاپسىرمانى گازا سەكتورىنداعى وتباسىلارعا ازىق-تۇلىك جاشىكتەرىن تىكەلەي تاراتاتىن حالىقارالىق ۇيىمدار مەن جەكە مەردىگەرلەرگە تاپسىرادى.
يزرايل ارمياسى تاراتۋعا تىكەلەي قاتىسپايدى، ءبىراق يزرايلدىك اسكەريلەر حالىقارالىق ۇيىمدار مەن مەردىگەرلەر ءۇشىن سىرتقى قاۋىپسىزدىك پەريمەترىن قامتاماسىز ەتەدى، دەيدى يزرايل جانە اراب شەنەۋنىكتەرى. يزرايل بيلىگى مۇنداي ءتاسىل حاماستىڭ گۋمانيتارلىق كومەككە قول جەتكىزۋىن جانە ونى سودىرلارعا قايتا باعىتتاۋىن قيىنداتادى دەپ ەسەپتەيدى.
گازا سەكتورىنىڭ ۇشتەن ءبىر بولىگىن باقىلاپ وتىرعان يزرايل ا ق ش- تىڭ قولداۋىمەن ەكى اي بويى شايقاستاردى توقتاتقان ءبىتىم شارتى بۇزىلعاننان كەيىن ناۋرىز ايىندا جەردەگى وپەراتسيالاردى قايتا باستادى. سودان بەرى انكلاۆقا باراتىن بارلىق گۋمانيتارلىق كومەك تولىعىمەن توقتاتىلدى.
حالىقارالىق قىزىل كرەست كوميتەتى (ح ق ك ك) گازا سەكتورىنداعى گۋمانيتارلىق وپەراتسيانىڭ «تولىق كۇيرەۋ شەگىندە» ەكەنىن مالىمدەدى.
بۇدان بۇرىن حابارلانعانداي، حالىقارالىق سوت گازا سەكتورىن بلوكاداعا بايلانىستى يزرايلگە قارسى شاعىمداردى قارايدى.
ەسكە سالساق، وسىعان دەيىن يزرايل گازاداعى وپەراتسياسىن كەڭەيتۋدى جوسپارلاپ وتىرعانى ءمالىم بولدى.