يزرايل اسكەريلەرى بۇرىن سوعىس بولماعان اۋدانداردا وپەراتسيا باستاماق

استانا. KAZINFORM - جەكسەنبى كۇنى يزرايل اسكەرى گازا سەكتورىنداعى ورتالىق اۋدانداردا تۇراتىن تۇرعىندارعا ۇيلەرىن تاستاپ، وڭتۇستىككە كوشۋگە بۇيرىق بەردى. بۇل ايماقتاردا بۇعان دەيىن اسكەري ارەكەتتەر بولماعان، دەپ حابارلايدى BBC.

ەۆاكۋاتسيا دەير ءال-بالاحقا شابۋىل باستالۋى مۇمكىن ەكەنىن كورسەتەدى. بۇل تۇتقىندا وتىرعان يزرايلدىكتەردىڭ تۋىستارى اراسىندا الاڭداۋشىلىق تۋدىرىپ وتىر. ولار وپەراتسيا تۇتقىنداردىڭ ومىرىنە قاۋىپ ءتوندىرۋى مۇمكىن دەپ ەسەپتەيدى.

يزرايل اسكەرى ءوز مالىمدەمەسىندە بۇل اۋداندا حاماس-تىڭ ينفراقۇرىلىمى جويىلاتىنىن حابارلادى. سونداي-اق يزرايل سولتۇستىكتەگى جاباليادا دا وپەراتسيالاردى كۇشەيتىپ، ونداعان سودىردىڭ كوزىن جويعانىن جانە 2,7 شاقىرىمدىق تۋننەلدى انىقتاپ، ولاردى دا ويران ەتكەنىن مالىمدەدى.

مەديتسينالىق دەرەكتەرگە سايكەس، سوڭعى تاۋلىكتە گازادا 45 ادام قازا تاپقان. ەلدە اشتىق ۋشىعىپ تۇر - 71 بالا كوز جۇمعان، 60 مىڭنان استام بالا تاماق جەتىسپەۋشىلىگىنەن زارداپ شەگۋدە.

ب ۇ ۇ اگەنتتىكتەرى يزرايلدەن گۋمانيتارلىق كومەكتى وتكىزۋگە رۇقسات بەرۋدى تالاپ ەتىپ وتىر. يزرايل مۇنداي كەدەرگىنىڭ بارىن جوققا شىعارىپ، حاماس-تى كومەكتى ۇرلاپ جاتىر دەپ ايىپتادى.

يزرايل مەن حاماس اراسىندا اتىستى توقتاتۋ جانە تۇتقىنداردى بوساتۋ بويىنشا كەلىسسوزدەر ءجۇرىپ جاتىر، ءبىراق ءالى ناقتى ناتيجە جوق.

ايتا كەتەيىك، قاتار، مىسىر مەن ا ق ش يزرايل مەن حاماس ۇيىمىنا گازا سەكتورىندا اتىستى توقتاتىپ، كەپىلدەگى ادامداردى بوساتۋ بويىنشا جاڭا ۇسىنىس جاسادى.