جۇما كۇنى يزرايلدىڭ ورتالىق سايلاۋ كوميتەتى 27-قازاندا وتكەن كنەسسەتتىڭ 26-شاقىرىلىمى سايلاۋىنىڭ قورىتىندى ناتيجەسىن جاريالادى.
ورتالىق سايلاۋ كوميتەتىنىڭ مالىمەتى بويىنشا، پرەمەر-مينيستر بينيامين نەتانياحۋدى قولدايتىن پارتيالار بلوگى 120-ورىنعا يە پارلامەنتتەن 53-ورىن، نەگىزگى وپپوزيتسيالىق بلوك 48-ورىن، ال ەكى اراب پارتياسى 19-ورىن الىپ وتىر، دەپ جازدى The Times of Israel.
نەتانياحۋدىڭ «ليكۋد» پارتياسى 27-ورىن جەڭىپ الىپ، پارلامەنتتەگى ەڭ ءىرى فراكسيا بولىپ قالا بەرمەك. يزرايل قورعانىس ارمياسى باس شتابىنىڭ بۇرىنعى باستىعى گادي ايزەنكوت باسشىلىق ەتەتىن «ياشار» پارتياسى 21-ورىنمەن ەكىنشى ورىن الدى.
قالعان ورىندار كەلەسىدەي ءبولىندى:
نافتالي بەننەت پەن يايرا لاپيدتىڭ «بەياحاد» پارتياسى - 12 ماندات؛
اراب «بىرىككەن ءتىزىمى» - 11 ماندات؛
«دەموكراتتار» مەن راام اراب پارتياسى - 8 مانداتتان؛
«ءبىزدىڭ ءۇيىمىز يزرايل»، «ياادۋت حا-تورا» جانە «وتسما يەحۋديت» - 7 مانداتتان؛
شاس پەن «ءدىني سيونيزم» - 6 مانداتتان الدى.
سايلاۋدا جالپى سايلاۋشىلاردىڭ 77,9 پايىزى - 5716665 ادام داۋىس بەردى. كەيبىر ساياسي توپتار 3,25 پايىز شەگىنەن وتە المادى.
سوندىقتان، نەگىزگى ساياسي بلوكتاردىڭ ەشقايسىسى ۇكىمەتتى ءوز بەتىنشە قۇرۋعا قاجەتتى 61 ماندات جيناي المادى.
سونىمەن قاتار، نەتانياحۋدىڭ بيلىگىن جالعاستىرۋىنا قارسى پارتيالار اراب فراكتسيالارىن قوسقاندا 67 ورىندى الىپ وتىر. ءبىراق ولار نەتانياحۋ بيلىگىنە قارسى كواليتسيا قۇرۋى ءۇشىن الدىمەن بۇرىندارى اراب پارتيالارىنىڭ ۇكىمەتكە قاتىسۋى جايلى پىكىرى ءبىر جەردەن شىقپاعان ساياسي كۇشتەر ءوز ۇستانىمدارىن ۇيلەستىرۋى قاجەت.
يزرايلدىڭ Kan قوعامدىق تەلەارناسىنىڭ حابارلاۋىنشا، وپپوزيتسيا وكىلدەرى مانسۋر ابباس باسقاراتىن راام پارتياسىمەن ىنتىماقتاستىق ەتۋ مۇمكىندىكتەرىن تالقىلاپ جاتىر. ال «بىرلەسكەن تىزىممەن» ىنتىماقتاستىق ماسەلەسى كۇردەلى بولىپ قالا بەرمەك.
«ياشار» كوشباسشىسى گادي ايزەنكوت دەموكراتتار ياير گولاننىڭ «دەموكراتتارىمەن» جانە نافتالي بەننەتتىڭ «بەياحاد» بلوگىمەن كەلىسسوزدەر جۇرگىزىپ ۇلگەرگەن. تاراپتار جاڭا ۇكىمەتتى تەز ارادا قۇرۋ مۇمكىندىگىن تالقىلادى. ءوز كەزەگىندە، بينيامين نەتانياحۋ يتامار بەن- گۆير، بەتسالەل سموتريچ سەكىلدى قازىرگى كواليتسيالىق سەرىكتەستەرىنە ساياسي وداقتى ساقتاۋ نيەتى بارىن ايتىپ سەندىرگەن.
30-قازانداعى ناتيجەلەر تەكسەرۋ راسىمدەرى اياقتالعاننان كەيىن رەسمي تۇردە بەكىتىلەدى.
ورتالىق سايلاۋ كوميسسياسى ولاردى 4-قاراشادا پرەزيدەنت يتسحاك گەرتسوگقا ۇسىنادى، ال جاڭا كنەسسەتتىڭ ءبىرىنشى سەسسياسى 10-قاراشاعا جوسپارلانعان.
وسىدان كەيىن ۇكىمەتتى جاساقتاۋ پروتسەسى باستالادى. ەگەر ساياسي پارتيالار كواليتسيا قۇرۋ تۋرالى كەلىسىمگە كەلە الماسا، يزرايلدە جاڭا پارلامەنتتىك سايلاۋ ءوتۋى دە عاجاپ ەمەس.
بۇعان دەيىن يزرايلدە پارلامەنت سايلاۋىنا سىرتتان ىقپال ەتۋ ارەكەتى تەكسەرىلىپ جاتقانىن حابارلاعان ەدىك.