يزرايل كنەسسەتى (پارلامەنت) ادام شىعىنىنا اكەلەتىن شابۋىل جاساعانى ءۇشىن سوتتالعان پالەستينالىقتارعا ءولىم جازاسىن تاعايىندايتىن زاڭ جوباسىن باسىم داۋىسپەن ماقۇلدادى. The Times of Israel باسىلىمىنىڭ حابارلاۋىنشا، زاڭ جوباسىن 62 دەپۋتات قولدادى، 48- ءى قارسى داۋىس بەردى.
زاڭعا سايكەس، يزرايلدىك ازاماتتى ولتىرگەنى ءۇشىن كىنالى دەپ تانىلعان باتىس جاعالاۋ تۇرعىندارى ءۇشىن نەگىزگى جازا - دارعا اسۋ ارقىلى ءولىم جازاسىنا كەسۋ. سوت ءومىر بويى باس بوستاندىعىنان ايىرۋدى تەك «ەرەكشە جاعدايدا» عانا تاعايىنداي الادى.
زاڭ تەك الداعى ىستەرگە قولدانىلادى. ءولىم جازاسىن تاعايىنداۋ ءۇشىن بىرنەشە سۋديانىڭ داۋىسى جەتكىلىكتى، ال اپەللياتسيالىق شاعىم بەرۋ قۇقىعى الىنىپ تاستالادى. زاڭنىڭ قابىلدانۋى باستامانى بەلسەندى تۇردە العا تارتقان «وتتسما يەحۋديت» پارتياسى مەن وڭشىل كۇشتەر ءۇشىن ساياسي جەڭىس بولدى. يزرايل پرەمەر-ءمينيسترى بينيامين نەتانياحۋ داۋىس بەرۋگە جەكە ءوزى قاتىسىپ، زاڭ جوباسىن قولدادى.
- بۇل قۇرباندار ءۇشىن ادىلەتتىلىك كۇنى جانە جاۋلارىمىز ءۇشىن ۇرەي كۇنى بولادى. تەرروريزمدى تاڭداعان ادام ءولىمدى تاڭدايدى، - دەدى يزرايلدىڭ ۇلتتىق قاۋىپسىزدىك ءمينيسترى يتامار بەن-گۆير.
اتالمىش زاڭ ادام قۇقىقتارى ۇيىمدارى تاراپىنان قاتاڭ سىنعا ۇشىرادى.
يزرايلدەگى ازاماتتىق قۇقىقتار قاۋىمداستىعى جوعارعى سوتقا ءومىر ءسۇرۋ، تەڭدىك جانە ءادىل سوت ءىسىن جۇرگىزۋ قۇقىعىن قوسا العاندا، نەگىزگى قۇقىقتاردىڭ بۇزىلۋىن ايتىپ، زاڭنىڭ كۇشىن جويۋدى تالاپ ەتىپ ءوتىنىش بەردى.
راماللاداعى پالەستينا اكىمشىلىگى زاڭنىڭ قابىلدانۋىن «قاۋىپتى شيەلەنىس» دەپ اتاپ، ونىڭ سوتتان تىس ولتىرۋلەردى زاڭداستىرۋعا باعىتتالعانىن مالىمدەدى.
ب ۇ ۇ- نىڭ ادام قۇقىقتارى جونىندەگى باسقارماسى ءولىم جازاسى حالىقارالىق مىندەتتەمەلەرگە قايشى كەلەتىنىن جانە ونى قاتىگەز ءارى قورلايتىن جازا دەپ ساناۋعا بولاتىنىن اتاپ ءوتتى.
ساراپشىلار يزرايل جوعارعى سوتىنىڭ زاڭ جوباسىن قايتا قاراۋىن، ونى جۇزەگە اسىرۋ ايماقتاعى شيەلەنىستى كۇشەيتۋى مۇمكىن ەكەنىن ەسكەرتتى.
ايتا كەتەيىك، يزرايلدىڭ گازاداعى شابۋىلدارىنان 2025 -جىلعى 10- قازاننان بەرى 702 ادام قازا تاپتى.