يزرايل پالميراعا اۋەدەن شابۋىل جاساپ، 36 ادام كوز جۇمدى

استانا. KAZINFORM - يزرايل ارمياسى سيريانىڭ تاريحي قالاسى پالميراعا جاساعان اۋە شابۋىلىنان 36 ادام كوز جۇمىپ، تاعى 50 ادام جارالاندى.

اۋە سوققىلارى تۇرعىن ۇيلەر مەن وندىرىستىك وشاقتارعا جاسالعان، دەپ حابارلايدى Kazinform نىڭ مەنشىكتى ءتىلشىسى.

«سارسەنبى كۇنى جەرگىلىكتى ۋاقىتپەن ساعات 13:30 شاماسىندا قالانىڭ تاريحي بولىگى بولىپ سانالاتىن ات- تانف اۋدانىنا زىمىراندار قۇلاپ، ونىڭ سالدارىنان 36 ادام كوز جۇمدى، تاعى 50 ادام جاراقات الدى»، - دەلىنگەن سيريالىق SANA اقپارات اگەنتتى تاراتقان حابارلامادا.

ات- تانف - سيريانىڭ وڭتۇستىك- شىعىس بولىگىندەگى يراك شەكاراسىنا جاقىن جاتقان اۋدان. بۇل اۋداندى ا ق ش اسكەرى باقىلايدى.

ايتا كەتسەك، سيريانىڭ پالميرا قالاسى يۋنەسكو- نىڭ تاريحي مۇرالار تىزىمىنە ەنگەن. كونە شاھار اتاۋى تۋرالى العاشقى دەرەكتەر ءبىزدىڭ داۋىرىمىزگە دەيىنگى ەكىنشى مىڭجىلدىقتاردا كەزدەسەدى. ەلدە سوعىس باستالماي تۇرعاندا قالا سيرياداعى ەڭ باستى تۋريستىك ورتالىقتىڭ ءبىرى سانالعان. سوعىس سالدارىنان مۇنداعى تاريحي ەسكەرتكىشتەر قاتتى زاقىمداندى. ماماندار كونە قالا جويىلىپ كەتۋ قاۋپى ءتونىپ تۇعانىن ايتۋدا.

بۇعان دەيىن حابارلاعانىمىزداي، ا ق ش قارۋلى كۇشتەرى سيرياداعى يران قولدايتىن سودىرلار توبىنىڭ قارۋ-جاراق قويماسىنا سوققى بەردى. بۇل سيريانىڭ سولتۇستىك- شىعىسىنداعى امەريكالىق بازاعا جاسالعان زىمىران شابۋىلىنان كەيىنگى ەكىنشى وپەراتسيا.