يزرايل اۋە كۇشتەرى يرانداعى زىمىران ينفراقۇرىلىمىنا سوققى بەردى

استانا. KAZINFORM - يزرايل يران نىساندارىنا ءبىرقاتار اۋە شابۋىلىن جالعاستىرىپ، قىسىمدى كۇشەيتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

يزرايل اسكەري-اۋە كۇشتەرى كەرمانشاح پروۆينتسياسىنداعى قويمالار مەن ۇشىرۋ الاڭدارىن، بالليستيكالىق زىمىرانداردى ۇشىرۋعا بايلانىستى ينفراقۇرىلىمدى جويعانىن مالىمدەپ، يران تەرريتورياسىنا كەزەكتى سوققىلار سەرياسىن جاسادى.

يزرايل قورعانىس كۇشتەرىنىڭ (ساحال) مالىمەتىنشە، وپەراتسياعا 15-تەن استام جويعىش ۇشاق قاتىسقان. سوققىلار يراننىڭ اۋە كەڭىستىگىنەن اۋە ۇستەمدىگىنە قول جەتكىزۋگە باعىتتالعان.

- ساحال ماقساتىنا جەتۋ ءۇشىن شابۋىلدى كۇشەيتۋدى جالعاستىرادى، - دەلىنگەن يزرايل ارمياسىنىڭ رەسمي مالىمدەمەسىندە.

سونىمەن بىرگە حوررەماباد ايماعىندا يزرايلدىڭ ۇشقىشسىز ۇشاعى تۇسىرىلگەنى راستالدى. الدىن الا مالىمەت بويىنشا، بۇل بارلاۋ ميسسيالارى ءۇشىن پايدالانىلعان Hermes مودەلى. ساحال قۇپيا اقپاراتتىڭ تارالۋ قاۋپى جوق دەپ سەندىردى.

دۇيسەنبىگە قاراعان ءتۇنى يزرايل سوققىلارى تەگەراننىڭ وڭتۇستىك-شىعىسىنداعى اسكەري كەشەن پارچين ايماعىندا جانە ۋران بايىتۋ قوندىرعىلارى وندىرىلەتىن كارادج قالاسىندا دا تىركەلدى. ەكى جاعدايدا دا يراننىڭ اۋە قورعانىس جۇيەلەرى ىسكە قوسىلدى.

بۇعان قوسا، يزرايل ارمياسى دۇيسەنبىگە قاراعان ءتۇنى يراننان ءبىر بالليستيكالىق زىمىران ۇشىرىلعانىن حابارلادى. ال تەل-اۆيۆ ايماعىندا سيرەنالار ىسكە قوسىلدى. قۇرباندار مەن قيراۋلار تىركەلگەن جوق.

دۇيسەنبى كۇنى تاڭەرتەڭ يران يزرايلگە تاعى ءبىر بالليستيكالىق زىمىران ۇشىردى. سيرەنالار ەستىلگەن اۋماقتارداعى بەيبىت تۇرعىندارعا كەلەسى ەسكەرتۋگە دەيىن ورىندارىندا قالۋعا بۇيرىق بەرىلدى.

ايتا كەتەيىك، تاياۋ شىعىستاعى قاقتىعىس اۋە قاتىناسىنا اسەر ەتىپ، رەيستەر توقتاتىلىپ جاتىر.

اۆتور

ەركەجان سماعۇلوۆا