يزرايل 641 پالەستينالىقتى تۇرمەدەن بوساتتى

يەرۋساليم. KAZINFORM - ازات ەتىلگەن پالەستينالىقتاردىڭ جالپى سانى 1776 عا جەتتى، دەپ حابارلايدى انادولى.

حاماس پەن يزرايل اراسىنداعى اتىستى توقتاتۋ جانە تۇتقىن الماسۋ كەلىسىمىنىڭ جەتىنشى راۋندى اياسىندا 641 پالەستينالىق تۇتقىن بوساتىلدى.

كەلىسىمنىڭ ءبىرىنشى كەزەڭىندە تاپسىرىلۋى ءتيىس بولعان ءتورت يزرايلدىك تۇتقىننىڭ دەنەسى يزرايلگە جەتكەننەن كەيىن پالەستينالىق تۇتقىندار دا بوساتىلدى. ولار باسىپ الىنعان باتىس جاعالاۋداعى وفەر اسكەري تۇرمەسىندە جانە يزرايلدىڭ وڭتۇستىگىندەگى كەزيوت تۇرمەسىندە بولعان. پالەستينالىقتار الماسۋ اياسىندا قىزىل كرەستكە تاپسىرىلدى.

قىزىل كرەست وفەر تۇرمەسىنەن شىعىپ، راماللا قالاسىنا باردى، ولاردى الەمگە ايگىلى پالەستينالىق اقىن ماحمۋد دارۆيش اتىنداعى مۇراجايدا ءدۇيىم جۇرت قارسى الدى.

تۇتقىندار الماسۋىنىڭ جەتىنشى راۋندى اياقتالدى، وسىلايشا كەلىسىمنىڭ ءبىرىنشى كەزەڭى ورىندالدى. 33 يزرايلدىك تۇتقىن اۋىستىرىلىپ، بوساتىلعان پالەستينالىقتاردىڭ جالپى سانى 1776 عا جەتتى.

ايتا كەتەيىك، بۇعان دەيىن حاماس 625 پالەستينالىق تۇتقىنعا ايىرباس رەتىندە يزرايلگە 4 ادامنىڭ ءمايىتىن بەرگەنىن جازعان ەدىك.

اۆتور

جاراسقان نۇرىبايەۆ