«قىتايمەن ۆيزاسىز رەجيم ەنگىزەمىز دەگەندە قانشاما حالىق شۋلادى. مىسالى، الەۋمەتتىك جەلىنى اشىپ قالساڭىز، «قىتاي جاۋلاپ الادى»، «قاۋىپسىزدىك نە بولادى؟»، «مەملەكەت قايدا قاراپ وتىر» دەگەن جازبالار مەن ۇراندار بولدى»، - دەدى ايبەك سمادياروۆ.
ونىڭ اتاپ وتۋىنشە، وتكەن جىلدىڭ 10-قاراشاسىندا كۇشىنە ەنگەن ەكى ەل اراسىنداعى كەلىسىم ءوز ناتيجەسىن بەرىپ جاتىر.
«ستاتيستيكاعا سۇيەنسەك، 2023-جىلعى 10-قاراشادان بەرى قازاقستانعا 126 مىڭ قىتاي ازاماتى كەلگەن. سونداي-اق وسى ۋاقىتتان بەرى قىتايعا 173 مىڭ قازاقستاندىق بارعان. ءوزىم دە 2 كۇن بۇرىن قىتايعا بارىپ كەلدىم. ۇشاقتىڭ بارىندە تولعان قازاقستان ازاماتتارى. سۇراستىرساڭ، كوبى تۋريست. مىسالى، 1-2 اتا-انانى كوردىم. ولار بالالارىن وقىتۋ ءۇشىن ۋنيۆەرسيتەت قاراۋعا بارا جاتىر ەكەن. سوندىقتان مادەني گۋمانيتارلىق بايلانىس نىعايىپ كەلەدى. پرەزيدەنتتىڭ جانە سىرتقى ىستەر ءمينيسترىنىڭ ساپارى دا وتە ءساتتى ءوتتى دەپ ويلايمىن»، - دەدى رەسمي وكىل.