ۆيزاسىز رەجيم ەنگىزىلگەننەن كەيىن ش ق و-عا قىتايدان كەلەتىن تۋريستەر سانى ارتقان

استانا. KAZINFORM - ۇكىمەت باسشىسى ولجاس بەكتەنوۆ شىعىس قازاقستان وبلىسىنىڭ تۋريستىك الەۋەتىمەن تانىسىپ، سالانى ودان ءارى دامىتۋ ءارى ونىڭ ءوڭىر ەكونوميكاسىنىڭ قۇرىلىمىنداعى ۇلەسىن ارتتىرۋ جونىندە ءبىرقاتار تاپسىرما بەردى.

بىرەگەي تابيعي-كليماتتىق جاعدايلاردىڭ ارقاسىندا ءوڭىر ءتۋريزمنىڭ بارلىق ءتۇرىن دامىتۋدىڭ زور مۇمكىندىكتەرىنە يە. بۇگىنگى تاڭدا دەمالۋشىلار اراسىندا بۇقتىرما سۋ قويماسى مەن سىبە كولدەرىنىڭ جاعاجايلارى، قاتون-قاراعاي اۋدانىنداعى پانتىمەن ەمدەۋ ورنى، ايماقتىڭ تاريحي نىساندارى، سونداي-اق گلۋبوكوە اۋدانى مەن ريددەردەگى تاۋ شاڭعىسى تۋريزمى تۇراقتى سۇرانىسقا يە. وتكەن جىلى ش ق و-داعى ىشكى تۋريستىك اعىن %2,7 عا ءوسىپ، دەمالۋشىلار سانى 350 مىڭنان استى. شەتەلدىك تۋريستەر سانىنىڭ ارتۋىنا قازاقستان مەن ق ح ر اراسىندا ورناتىلعان ۆيزاسىز رەجيم ىقپال ەتتى.

پرەمەر-مينيستر ولجاس بەكتەنوۆ گلۋبوكوە اۋدانىنىڭ تۋريستىك ينفراقۇرىلىمىمەن جانە ەكوتۋريزمدى دامىتۋ جوسپارىمەن تانىستى. ەكولوگيالىق ستاندارتتاردى ساقتاي وتىرىپ ىسكە اسىرۋ كوزدەلىپ وتىرعان جوبالار ۇسىنىلدى. ۇكىمەت باسشىسىنا وڭىردە ساناتوري-كۋرورتتىق، قىسقى، اۋىل تۋريزمى تۇرلەرىنىڭ دامۋى تۋرالى باياندالدى. جالپى، تۋريزم سالاسىن دامىتۋعا جانە جاڭا نىسانداردىڭ قۇرىلىسىنا وتكەن جىلى 12 ميلليارد تەڭگە ينۆەستيتسيا سالىندى.

«شىعىس قازاقستان وبلىسىنىڭ ەكولوگيالىق تۋريزمدى دامىتۋعا ايتارلىقتاي الەۋەتى بار. پرەزيدەنت اتاپ وتكەندەي، تۋريستىك سالاعا ينۆەستورلار تارتۋ ءۇشىن اشىق ءارى قولايلى جاعداي جاساۋ قاجەت. بۇگىنگى تاڭدا وبلىستا جەكە ينۆەستيتسيالار تارتا وتىرىپ، جوبالاردى ىسكە اسىرۋ ماسەلەسى پىسىقتالۋدا. وسى باعىتتا ءوڭىر مەن ورتالىقتىڭ كۇش- جىگەرىن بىرىكتىرۋدى تاپسىرامىن»، - دەدى ولجاس بەكتەنوۆ.

پرەمەر-مينيستر تاۋ شاڭعىسى تۋريزمىن دامىتۋ جانە تانىمال ەتۋ قاجەتتىلىگىنە باسا نازار اۋداردى. قىسقى جانە تاۋ شاڭعىسى سپورت تۇرلەرى بويىنشا ەل قۇراماسىنداعى سپورتشىلاردىڭ كوبى شىعىس قازاقستان وبلىسىنىڭ تۋماسى ەكەنى اتاپ ءوتىلدى. «ريددەر - گلۋبوكوە» تاۋ شاڭعىسى كلاستەرىن ودان ءارى دامىتۋ ءۇشىن تۋريزم جانە سپورت مينيسترلىگىنە قىسقى سپورت تۇرلەرىن دامىتۋعا جاردەم كورسەتۋ تاپسىرىلدى.

ولجاس بەكتەنوۆ تۋريستىك الەۋەتتى اشۋ ءۇشىن كولىك جەلىسى مەن اۋە قاتىناسىن دامىتۋ بويىنشا قابىلدانىپ جاتقان شارالارمەن تانىستى. كۋرورتتىق ايماقتىڭ كولىك- لوگيستيكالىق قولجەتىمدىلىگىن قامتاماسىز ەتۋ ماقساتىندا استانا، الماتى، شىمكەنت جانە قاراعاندىدان وسكەمەنگە تىكەلەي اۋە قاتىناسى جولعا قويىلعان. اتىراۋدان تىكەلەي باعىت اشۋ كەلىسىلىپ جاتىر.

بۇل رەتتە ۇكىمەت باسشىسى جول توسەمىنىڭ ساپاسىنا جانە جول بويىنداعى سەرۆيستىڭ زاماناۋي جەلىسىن قۇرۋعا جەكەلەي توقتالدى.

«قاناس - مارقاكول» كولدەرىنىڭ ترانسشەكارالىق باعىتىن ۇيىمداستىرۋ ءۇشىن تەرەكتى اۋىلىنان مارقاكول كولىنە دەيىنگى جول جابىنىن سالۋ ماسەلەسىن پىسىقتاۋ، سونداي-اق ش ق و اۋماعى ارقىلى وتەتىن رەسپۋبليكالىق ماڭىزى بار اۆتوموبيل جولدارىنىڭ بويىندا كەمىندە 15 سانيتارلىق-گيگيەنالىق توراپ سالۋدى قامتاماسىز ەتۋ تاپسىرىلدى.

اۆتور
ابىلايحان جۇماشيەۆ