جالعان اقپاراتقا قارسى ءىس-قيمىل ورتالىعىنىڭ مالىمەتىنشە، شەتەلدىك الەۋمەتتىك جەلىلەر سەگمەنتىندە تۋريزم جانە سپورت ءمينيسترى ەربول مىرزابوسىنوۆتىڭ اتىنان ايتىلعان، الايدا وعان تيەسىلى ەمەس مالىمدەمەلەر تارالىپ جاتىر.
- تالداۋ ناتيجەسىندە بۇل اقپاراتتىق ماتەريالدىڭ X جانە Bluesky پلاتفورمالارىنداعى اككاۋنتتار ارقىلى ورىس، چەح جانە اعىلشىن تىلدەرىندە تاراتىلعانى انىقتالدى. اقپاراتتى تاراتۋشىلار قاتارىندا شىعىس جانە ورتالىق ەۋروپانىڭ بىرنەشە ەلىندە ورنالاسقان پايدالانۋشىلار بار. X پلاتفورماسىنداعى باستاپقى جاريالانىم بىرنەشە ساعات ىشىندە 12 مىڭنان استام قارالىم جيناپ، 200 دەن اسا رەپوست جاسالدى. بىردەي مازمۇنداعى مالىمدەمەنىڭ ءبىر مەزگىلدە بىرنەشە تىلدە تارالۋى جالعان اقپاراتتىڭ جۇيەلى تۇردە ۇيىمداستىرىلعانىن اڭعارتادى، - دەيدى ۆەدومستۆو ماماندارى.
بۇل رەتتە، قازاقستان حوككەي فەدەراتسياسىنىڭ اتقارۋشى ديرەكتورى تارالعان اقپاراتتى رەسمي تۇردە تەرىسكە شىعاردى.
- ءبىرقاتار شەتەلدىك بۇقارالىق اقپارات قۇرالدارى مەن الەۋمەتتىك جەلىلەردە قازاقستان حوككەي فەدەراتسياسى رەسەيلىك حوككەيشىلەرگە بويكوت جاريالاۋدى قولدادى دەگەن مازمۇنداعى اقپارات تارالۋدا. اتالعان اقپارات شىندىققا جاناسپايدى. قازاقستان حالىقارالىق حوككەي فەدەراتسياسىنىڭ (IIHF) تولىققاندى مۇشەسى جانە ءوز قىزمەتىن ۇيىم جارعىسى مەن رەگلامەنتتەرىنە قاتاڭ سايكەس جۇزەگە اسىرادى. ءبىزدىڭ ۇستانىمىمىز بويىنشا، ۇلتتىق قۇرامالاردىڭ حالىقارالىق جارىستارعا قاتىسۋىنا رۇقسات بەرۋ جانە الەم چەمپيوناتتارىنا قاتىسۋشىلار قۇرامىن ايقىنداۋ ماسەلەلەرى حالىقارالىق حوككەي فەدەراتسياسىنىڭ ايرىقشا قۇزىرەتىنە جاتادى. مۇنداي شەشىمدەر ءتيىستى سوت ورگاندارىنىڭ ۇستانىمى مەن قولدانىستاعى حالىقارالىق سپورت نورمالارى ەسكەرىلە وتىرىپ قابىلدانۋعا ءتيىس. قازاقستان حوككەي فەدەراتسياسى حالىقارالىق ىنتىماقتاستىقتى دامىتۋ، سپورتتاعى ادال باسەكەلەستىكتى قامتاماسىز ەتۋ جانە بارلىق قاتىسۋشى ءۇشىن تەڭ جاعداي قالىپتاستىرۋ قاعيداتتارىن تۇراقتى تۇردە قولدايدى، - دەلىنگەن فەدەراتسيا تاراتقان اقپاراتتا.
وسىلايشا، الەۋمەتتىك جەلىلەردە تارالىپ جاتقان مالىمدەمەلەر شىندىققا سايكەس كەلمەيدى. قازاقستاننىڭ رەسمي ۇستانىمىن بۇرمالاۋ ارقىلى حالىقارالىق شيەلەنىستى قولدان كۇشەيتۋ كوزدەلۋى مۇمكىن.
جالعان اقپاراتقا قارسى ءىس-قيمىل ورتالىعى الەۋمەتتىك جەلىلەردەگى جاريالانىمدارعا سىني كوزقاراسپەن قاراپ، ونداعى مالىمەتتەردى رەسمي دەرەككوزدەر ارقىلى مىندەتتى تۇردە تەكسەرۋ قاجەتتىگىن تاعى دا ەسكە سالادى.
بۇعان دەيىن الەمدى دۇرلىكتىرگەن 12 فەيك تۋرالى جازعانبىز.