يگى ىستەردى قوعامنىڭ كوبىرەك بىلگەنى ابزال - تيفلوپەداگوگ
تاياۋدا عانا ەلوردادا «ق ر پرەزيدەنتى تەلەراديوكەشەنىنە» قاراستى Jibek Joly تەلەارناسىنداعى «جاقسى ادامدارىم» باعدارلاماسىنىڭ بيىلعى قورىتىندى سانى ءتۇسىرىلدى.
اتاپ ايتقاندا، بىرنەشە ازامات «جاقسى ادام-2023» ارنايى سىيلىعىمەن سالتاناتتى تۇردە ماراپاتتالدى. سونىڭ ءبىرى - استاناداعى №10 مەكتەپ- گيمنازيانىڭ تيفلوپەداگوگى ساۋلە ساعىمبايەۆا. Kazinform ءتىلشىسى ينكليۋزيۆتى ءبىلىم بەرۋگە ۇلەس قوسىپ جۇرگەن ۇستازدى سوزگە تارتقان ەدى.
- ساۋلە ليابي قىزى، الدىمەن ءوزىڭىز تۋرالى ايتىپ وتسەڭىز…
- تۋىپ وسكەن جەرىم - سەمەي قالاسى. پەداگوگيكا سالاسىندا 1984-جىلدان باستاپ ەڭبەك ەتىپ كەلەمىن. جالپى ءبىلىم بەرەتىن مەكتەپتەن باستادىم، قازىر ەڭبەك ءوتىلىم - 40 جىل. ۋكراينادا ورىس ءتىلى ماماندىعىن يگەردىم. سەمەيدە كوزى ناشار كورەتىن بالالار وقيتىن مەكتەپتە 15 جىل جۇمىس ىستەدىم. تيفلوپەداگوگپىن. الداعى جىلى قاڭتاردا زەينەتكە شىعامىن.
- ەلوردادا ءسىزدى قانداي وزگەرىستەر كۇتتى؟ جۇمىستى نەدەن باستادىڭىز؟
- 2014 -جىلى بالالارىم استاناعا كوشىپ كەلگەننەن كەيىن مەن دە كەلدىم. ول كەزدە ەلوردادا اتالعان سالا ەندى-ەندى قولعا الىنىپ جاتقان، بالالار از، ارنايى مەكتەپتەر جوقتىق قاسى. ۋاقىت وتە كەلە مەكتەپتەردە ارنايى كابينەتتەر اشىلا باستادى. جالپى كوزى ناشار كورەتىن جانە مۇلدەم كورمەيتىن بالالار 8 دەڭگەيگە بولىنەدى. ۋاقىت وتە كەلە دەفەكتولوگ ماماندىعىن وقىدىم.
- قازىر قاي مەكتەپتە ەڭبەك ەتىپ جاتىرسىز؟ جەتىستىكتەرىڭىزبەن بولىسسەڭىز…
- قازىر ەلورداداعى № 10 مەكتەپ- گيمنازيادا ەڭبەك ەتەمىن. تاجىريبەمدە 10 جاسىنا دەيىن مەكتەپكە بارماعان بالانى وقىتقان كەزدەر بولدى. وعان سەبەپ، اتا-انالارى نامىستانادى، قوعامعا كورسەتكىسى كەلمەيدى، ت. س. س. دەگەنمەن، كوزى ناشار جانە مۇلدەم كورمەيتىن بالالارعا قوعامنىڭ نازارى ەرەكشە. بۇل ەرەكشە بالالار وتە زەرەك كەلەدى.
- «جاقسى ادامدارىم» جوباسى تۋرالى ايتىڭىزشى. سىزگە ۇسىنىس ءتۇستى مە، الدە قاتىسۋعا ءوزىڭىز نيەت تانىتتىڭىز با؟
- مەن وسى جىلدارى ۇستازدارمەن تاجىريبەمدى ءبولىسىپ، قالالىق، رەسپۋبليكالىق دەڭگەيدە ءتۇرلى سەمينارلار، ترەنينگتەر وتكىزىپ كەلەم. قالالىق ءبىلىم باسقارماسى جانە وقۋ-اعارتۋ مينيسترلىگى ىقپال ەتتى. سونىمەن قاتار جەكە ۇيىمدار دا قولداۋ كورسەتتى. تاياۋدا مينيسترلىكتەن حابارلاستى «جاقسى ادامدار» دەگەن رەسپۋبليكالىق تەليەۆيزيالىق باعدارلاما بار، بالالارىڭىزبەن قاتىسساڭىز» دەپ. مەن ۇسىنىستى قۋانا قابىل الدىم. ويتكەنى، يگى ىستەردى قوعامنىڭ كوبىرەك بىلگەنى، ەڭبەكتى كورسەتكەن ابزال. ول الدىمەن قوعامنىڭ نازارىن اۋدارادى، اتا-انالارعا قولداۋ جانە بالالاردىڭ دامي تۇسۋىنە، اشىلا تۇسۋىنە ىقپالى زور. مىسالى، ءبىر وقۋشىم بار 40 كومپوزيتسيانى جاتقا بىلەدى، ونىڭ ىشىندە قازاق جانە شەتەل شىعارمالارى بار. بالالارىمنىڭ ءار جەتىستىگىن كورىپ قۋانامىن. ولار ءۇشىن تاعى ءبىر ۇلكەن كومەك - سپورت. بالالاردى اپتاسىنا بىرنەشە رەت قالاداعى پاراليمپيادالىق ورتالىققا اپارامىز. كوزى ناشار كورەتىن جانە مۇلدەم كورمەيتىن بالالارعا ارنالعان كۋرس جيناعىن شىعاردىم.
- جوبا ءوتىپ جاتقاندا قانداي كوڭىل-كۇيدە بولدىڭىز، قوبالجۋ بولدى ما؟
- ارينە قوبالجۋ بولدى، ونىڭ ۇستىنە رەسپۋبليكالىق دەڭگەيدە، ەلىمىزدىڭ تۇكپىر- تۇكپىرىنەن قاتىستى. دەگەنمەن، ءۇمىت بولدى ارينە. جەڭگەنىمە وتە قۋانىشتىمىن، بۇل جەڭىس - كوپتەگەن پەداگوگتىڭ ەڭبەگى، مەن جالعىز ءوزىم ەشتەڭە دە ىستەي الماس ەدىم. ۇيىمداستىرۋشىلارعا مىڭ العىس. ارينە، بۇل باعىتتاعى جۇمىستاردى جالعاستىرامىز.
ايتا كەتەيىك، Jibek Joly تەلەارناسىنداعى «جاقسى ادامدارىم» جوباسىنىڭ ماقساتى - ءارتۇرلى سالادا ەڭبەك ەتىپ، ەل دامۋىنا ولشەۋسىز ۇلەس قوسىپ جۇرگەن مىقتى مامانداردى، ەڭبەك ادامدارىن، قايىرىمدى جانداردى حالىققا تانىستىرۋ. بيىل ءداستۇرلى ءىس- شارادا ءبىلىم، عىلىم، مەديتسينا، سپورت جانە قۇتقارۋ قىزمەتى بويىنشا 7 ادامعا ارنايى سىيلىق تاپسىرىلدى.