يوردانيا سوتى شىركەۋگە شابۋىل جاساعان ءۇش ادامدى ءولىم جازاسىنا كەستى

استانا. KAZINFORM — يوردانيا مەملەكەتتىك قاۋىپسىزدىك سوتى شىركەۋگە قارۋلى شابۋىل جاساپ، توعىز ادامنىڭ ءومىرىن قيعان ءۇش ەر ادامدى ءولىم جازاسىنا كەستى، دەپ حابارلايدى Kazinform Anadolu اگەنتتىگىنە سىلتەمە جاساپ.

Фото: Kazinform\ЖИ

سوت ۇكىمى 15-قاراشادا شىقتى. ايىپتالۋشىلار تەرروريستىك ارەكەتتەرگە بارعانى، قارۋ قولدانۋ ارقىلى تەراكت ۇيىمداستىرۋعا ءسوز بايلاسقانى جانە تەرروريستىك توپتىڭ يدەولوگياسىن تاراتقانى ءۇشىن كىنالى دەپ تانىلدى. سونداي-اق ولاردىڭ بىرىنە تەرروريزمدى قارجىلاندىرۋ ايىبى دا تاعىلدى.

ەسكە سالا كەتەيىك، 23 -قازاندا ەلدىڭ باتىسىنداعى كاراك قالاسىنداعى شىركەۋدە جەرلەۋ ءراسىمى كەزىندە قارۋلى شابۋىل جاسالدى. قارۋلى قاقتىعىستان توعىز ادام قازا تاۋىپ، تاعى 34 ادام جاراقات الدى.

Фото: PETRA

يوردانيا قوعامدىق قاۋىپسىزدىك باسقارماسىنىڭ مالىمەتىنشە، كۇدىكتىلەر 26-قازاندا بىرلەسكەن ىزدەستىرۋ وپەراتسياسى كەزىندە ۇستالعان.

قۇقىق قورعاۋ ورگاندارىنىڭ قىزمەتكەرلەرى كۇدىكتىلەردى قاراۋسىز قالعان ۇيدەن تاپقان. ۇستاۋ كەزىندە ولار بەرىلۋدەن باس تارتىپ، وق جاۋدىرعان.

وپەراتسيا بارىسىندا ۇشەۋى دە جاراقات العان كۇيدە قولعا ءتۇستى. وقيعا ورنىنان اتىس قارۋى مەن وق-دارىلەر تاركىلەندى.