- ءوزىڭىز ەسكە سالعانداي، بىلتىر ءبىر-ءبىرىمىزدىڭ ەلىمىزگە جاساعان ساپارلارىمىز ەكىجاقتى قارىم- قاتىناستى ىلگەرىلەتۋگە ەرەكشە سەرپىن بەردى. ءبىز قول جەتكىزىلگەن ۋاعدالاستىقتاردى ودان ءارى ءوربىتىپ، ساۋدا، ينۆەستيتسيا، تۋريزم، تەحنولوگيا جانە قورعانىس سەكىلدى نەگىزگى باعىتتاردا ىنتىماقتاستىقتى كەڭەيتۋگە نيەتتىمىز، - دەدى يوردانيا كورولى.
سونىمەن بىرگە، II ابداللا بەن ءال-حۋسەين اقابا پروتسەسى اياسىنداعى كەزدەسۋلەردىڭ جاڭا راۋندىن بىرلەسە ۇيىمداستىرعانى ءۇشىن قاسىم-جومارت توقايەۆقا شىنايى ريزاشىلىعىن ءبىلدىردى.
ونىڭ ايتۋىنشا، بۇل ەكى ەلدىڭ قاۋىپسىزدىك سالاسىنداعى وڭىرلىك جانە جاھاندىق سىن- قاتەرلەردى شەشۋگە بەيىلدىگىن كورسەتەدى.
وسى ورايدا، يوردانيا كورولى وڭىرلىك قاۋىپسىزدىكتى قامتاماسىز ەتۋ، سونداي-اق تەرروريزم مەن ەكسترەميزمگە قارسى كۇرەس ىسىندە قازاقستانمەن ىقپالداستىقتى كەڭەيتۋگە مۇددەلى ەكەنىن راستادى.
ايتا كەتەيىك، 6-قاراشادا استانادا اقابا پروتسەسى سامميتى وتەدى. مۇنداي فورماتتاعى كەزدەسۋگە ورتالىق ازيا العاش رەت ۇيىمداستىرۋشىلاردىڭ ءبىرى رەتىندە قاتىسىپ وتىر.
اقابا پروتسەسى - 2015 -جىلى يوردانيا كورولى II ابداللا باستاماشى بولعان حالىقارالىق باستاما. ونىڭ باستى ماقساتى - تەرروريزمگە، ەكسترەميزمگە جانە ترانسۇلتتىق قىلمىسقا قارسى كۇرەستە مەملەكەتتەر اراسىنداعى ىنتىماقتاستىقتى نىعايتۋ.
بۇعان دەيىن پرەزيدەنت قاسىم-جومارت توقايەۆ سەسسيانىڭ جاساندى ينتەللەكت سالاسىنداعى قاۋىپسىزدىك تاقىرىبىنا ارنالاتىنىن حابارلادى.
بۇگىن پرەزيدەنت قاسىم-جومارت توقايەۆتىڭ شاقىرۋىمەن قازاقستانعا يوردان حاشيميت كورولدىگىنىڭ كورولى II ابداللا بەن ءال-حۋسەين رەسمي ساپارمەن كەلدى. استانا اۋەجايىندا يوردانيا كورولىن مەملەكەت باسشىسىنىڭ ءوزى كۇتىپ الدى.
سونداي-اق اقوردادا قازاقستان پرەزيدەنتى قاسىم-جومارت توقايەۆ پەن يوردانيا كورولى II ابداللا بەن ءال-حۋسەين كەلىسسوز جۇرگىزدى.