اقوردادا مارتەبەلى مەيماندى قارسى الۋ ءراسىمى باستالدى. قاسىم-جومارت توقايەۆ پەن II ابداللا بەن ءال-حۋسەين ءبىر-بىرىنە رەسمي دەلەگاتسيا مۇشەلەرىن تانىستىردى. ودان كەيىن قۇرمەت قاراۋىلى روتاسىنىڭ كومانديرى سالتاناتتى راپورت بەردى.
پرەزيدەنت وركەسترى قازاقستان مەن يوردانيانىڭ مەملەكەتتىك ءانۇراندارىن ورىندادى.
ءانۇرانداردى تىڭداپ بولعان سوڭ قاسىم-جومارت توقايەۆ پەن يوردانيا كورولى كىلەمشە بويىمەن قازاقستان رەسپۋبليكاسىنىڭ مەملەكەتتىك تۋىنا قاراي ءجۇردى.
تۋ الدىنا كەلگەندە مەيمان توقتاپ، باس ءيىپ، ءوزىنىڭ قۇرمەتىن ءبىلدىردى. سونان سوڭ يوردانيا كورولى مەن پرەزيدەنت قۇرمەتتى قاراۋىل ساپىنىڭ بويىمەن ءجۇردى.
بۇدان كەيىن تاراپتار شاعىن قۇرامدا كەلىسسوزدەر جۇرگىزۋگە كىرىستى. جوعارى دەڭگەيدەگى كەلىسسوزدەردە ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق سالالارداعى ەكىجاقتى ىنتىماقتاستىقتى كەڭەيتۋ پەرسپەكتيۆاسى تالقىلانادى.
سونىمەن بىرگە، يوردانيا كورولى 6-قاراشا كۇنى استانادا وتەتىن اقابا پروتسەسى سامميتىنە قاتىسادى. بۇل جيىنعا ءبىرقاتار مەملەكەتتىڭ باسشىلارى قاتىسادى.
اقابا پروتسەسى - 2015 -جىلى يوردانيا كورولى II ابداللا باستاماشى بولعان حالىقارالىق باستاما. ونىڭ باستى ماقساتى - تەرروريزمگە، ەكسترەميزمگە جانە ترانسۇلتتىق قىلمىسقا قارسى كۇرەستە مەملەكەتتەر اراسىنداعى ىنتىماقتاستىقتى نىعايتۋ.
ەسكە سالا كەتسەك، بىلتىر 26-27-تامىزدا يوردانيا پاتشاسى قازاقستانعا رەسمي ساپار جاساعان ەدى.
ءوز كەزەگىندە پرەزيدەنت قاسىم-جومارت توقايەۆ 2025 -جىلعى اقپاندا يوردان حاشيميت كورولدىگىنە باردى.