يگور لەپەحا تۇرعىن ءۇي قاپتاماسىنىڭ قۇلاۋى جونىندە پىكىر ءبىلدىردى

استانا. KAZINFORM - ق ر ىشكى ىستەر ءمينيسترىنىڭ ورىنباسارى يگور لەپەحا ەلوردادا تۇرعىن ءۇي كەشەنىنىڭ قاسبەتىندەگى كىرپىش قاپتاماسىنىڭ قۇلاۋى وقيعاسىن تەرگەۋ بويىنشا پىكىر ايتتى.

- بارلىعىنا زاڭناما تۇرعىسىندا باعا بەرىلەدى، ياعني قۇرىلىستى سالعاندار دا، تۇرعىن ءۇي كەشەنىن پايدالانۋ ماسەلەسى دە قامتىلادى. بۇل رەتتە قاۋىپسىزدىك تالاپتارىنا قاتىستى قىزمەتتەردى كورسەتپەۋ، سونداي-اق قۇرىلىس دەرەگى بويىنشا قاراستىرامىز. ءىس قوزعالدى، كىنالىلەر انىقتالادى. قازىر تەرگەۋ ءجۇرىپ جاتىر، - دەدى يگور لەپەحا پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

ەسكە سالا كەتەيىك، بۇعان دەيىن استانانىڭ الماتى اۋدانىندا، تاۋەلسىزدىك داڭعىلى، ب24 -مەكەنجايىندا توعىز قاباتتى تۇرعىن ءۇيدىڭ قاسبەتىنەن كىرپىشتەن جاسالعان سىرتقى قاپتاما مەن كونديتسيونەر قوندىرعىسى قۇلاپ، بەس ادام زارداپ شەككەنىن جازعان بولاتىنبىز.

كەيىن عيمارات وپىرىلعاندا زارداپ شەككەن فەلدشەر كوز جۇمدى.

بۇل جاعداي قىلمىستىق كودەكستىڭ 306-بابى (قاۋىپسىزدىك تالاپتارىنا ساي كەلمەيتىن تاۋارلاردى شىعارۋ نەمەسە ساتۋ، جۇمىستاردى ورىنداۋ نە قىزمەتتەر كورسەتۋ) بويىنشا تەرگەلىپ جاتىر. 

اۆتور

رۋسلان عابباسوۆ