يگور لەپەحا مەكتەپتەردى كۇزەتۋگە جۇمىلدىرىلعان ۇيىمدارعا قاتىستى پروبلەمانى ايتتى

استانا. KAZINFORM - پارلامەنت ءماجىلىسى جانىنداعى قوعامدىق پالاتا وتىرىسىندا «قۇقىق بۇزۋشىلىقتىڭ پروفيلاكتيكاسى تۋرالى» زاڭ جوباسىن تالقىلاۋ كەزىندە مەكتەپتەردەگى قاۋىپسىزدىك ماسەلەسى كوتەرىلدى.

ءماجىلىس دەپۋتاتى ناتاليا دەمەنتيەۆا مەكتەپتەردەگى كامەلەت جاسىنا تولماعانداردىڭ تارتىبىنە، قاۋىپسىزدىگىنە قاتىستى ۇسىنىس ايتتى.

- بۇگىندە كۇزەت ۇيىمدارى ءبىلىم بەرۋ مەكەمەلەرىنە كۇزەتشى رەتىندە ءوز جۇمىسىن ءتيىستى دەڭگەيدە اتقارا المايتىن ادامداردى جىبەرەدى. ولاردىڭ اراسىندا زەينەت جاسىنداعى ادامدار بارشىلىق. اتاپ ايتقاندا، مەكتەپتەردەگى جاعدايدى قاداعالاۋعا ۋچاسكەلىك ينسپەكتورلار دا جەتىسپەي جاتىر، سونداي-اق كۇزەت اگەنتتىكتەرىنىڭ وكىلدەرى دە ءتيىستى قىزمەتتى كورسەتە المايدى. ماسەلەن، كامەلەتكە تولماعاندار اراسىندا كيكىلجىڭ ورىن العاندا، وسى احۋالعا توسقاۋىل قويا الاتىن ءتيىستى قىزمەتكەرلەر تابىلماي جاتادى. بۇگىن تالقىلانىپ وتىرعان زاڭ جوباسى اياسىندا ءتيىستى ولشەم شارتتاردى ازىرلەپ، رەتتەۋ ءىس-شارالارىن دايارلاۋ كەرەك شىعار؟ شىن مانىندە، مەكتەپتەردە شەكتەن شىققاندىق جاعدايلار بولىپ جاتادى. وسى جايىندا مەكتەپ ديرەكتورلارى دا، اتا-انالار دا شىعىمدانىپ جاتادى، - دەدى ن. دەمەنتيەۆا.

ءوز كەزەگىندە ق ر ىشكى ىستەر ءمينيسترىنىڭ ورىنباسارى يگور لەپەحا ەلىمىزدە حالىق سانىنىڭ وسۋىنە بايلانىستى مەكتەپتەردىڭ سانى دا ارتىپ كەلە جاتقانىن ەسكە سالدى. وڭتايلاندىرۋ ءىس-شارالارى ناتيجەسىندە كەيىنگى كەزدەرى پوليتسەيلەر سانى قىسقارعان. جالپى، پوليتسيا بويىنشا بىزدە 25 مىڭ ادام جەتىسپەيدى، ونىڭ ىشىندە 13 مىڭى جەرگىلىكتى پوليتسيا -ۋچاسكەلىك ينسپەكتورلار مەن ولاردىڭ كومەكشىلەر جانە باسقالارى.

- ال كۇزەت اگەنتتىكتەرىنە توقتالساق، بۇل باعىتتا وقۋ-اعارتۋ مينيسترلىگى وكىلەتتى ورگان سانالادى. 100 دەن استام وقۋشىسى مەن پەداگوگ ۇجىمى بار مەكتەپتەر لاڭكەستىك تۇرعىدا وسال نىساندار ساناتىنا جاتادى. بۇل رەتتە، وقۋ-اعارتۋ مينيسترلىگى سۋبەكتىلەرگە تالاپتاردى دايارلادى، ياعني تۋرنيكەتتەر، دابىل تۇيمەسى جانە كۇزەت قىزمەتىنە قاتىستى ماسەلەلەردى قامتىدى. ەڭ باستىسى، بۇل تۇرعىدا مينيسترلىكتىڭ ەمەس، مەكتەپ ديرەكتورىنىڭ قۇزىرەتىنە ەكپىن قويىلعان. كونكۋرستىق قۇجاتتامادا ديرەكتور: «مەكتەپتى 45 جاستان اسپاعان ادامدار كۇزەتۋى ءتيىس» دەپ تالاپ ەتە الادى. دەگەنمەن، جەرگىلىكتى دەڭگەيدە قارجىلاندىرۋدىڭ جەتىسپەۋى ماسەلەسى بار. ديرەكتورلارعا از كولەمدەگى قارجىلاندىرۋ عانا بەرىلەدى. دەمپينگ سالدارىنان ساپاسىز قىزمەت كورسەتەتىن كۇزەت فيرمالارى تارتىلىپ جاتادى. سوندىقتان جەرگىلىكتى اتقارۋشى ورگانداردىڭ قارجىلاندىرۋ پروبلەماسىن شەشۋ كەرەك، - دەدى ي. لەپەحا.

ەسكە سالساق، ماڭعىستاۋدا مەكتەپ وقۋشىلارى توبەلەسىپ، ءبىر بالا اۋرۋحاناعا ءتۇستى.

اۆتور

رۋسلان عابباسوۆ