بۇل تۋرالى قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ حالىققا ارناعان «قازاقستاننىڭ جاڭا تاريحي كەزەڭدەگى وزەكتى مىندەتتەرى» اتتى جىل سايىنعى جولداۋىندا مالىمدەدى.
- ءبىز مەديتسينالىق- سانيتاريالىق العاشقى كومەك جۇيەسىن جاڭعىرتۋعا دا ەرەكشە نازار اۋدارىپ وتىرمىز. وسىعان بايلانىستى جالپى پراكتيكا دارىگەرلەرىنىڭ وكىلەتتىكتەرىن كەڭەيتىپ، بۇل جۇيەنى قارجىلاندىرۋ كولەمىن كەزەڭ- كەزەڭىمەن ۇلعايتۋ ماڭىزدى. ۇكىمەتكە كەلەسى جىلعى 1-قاڭتاردان باستاپ وسى باعىتتا جۇمىس ىستەيتىن ۋچاسكەلىك قىزمەت ماماندارىنىڭ جالاقىسىن ۇزدىكسىز ەڭبەك وتىلىنە قاراي 40 پايىزعا دەيىن ارتتىرۋدى تاپسىرامىن. بۇل 77 مىڭنان استام ماماننىڭ تابىسىن كوبەيتۋگە مۇمكىندىك بەرەدى، - دەپ اتاپ ءوتتى مەملەكەت باسشىسى.
قوسىمشا اقىنىڭ مولشەرى ەڭبەك ءوتىلىنىڭ ۇزاقتىعىنا بايلانىستى بەلگىلەنەدى. ول لاۋازىمدىق جالاقىنىڭ 50 پايىزىنا دەيىن جەتۋى مۇمكىن.
قوسىمشا اقىنىڭ مىناداي مولشەرلەرىن بەلگىلەۋ ۇسىنىلادى:
* 2 جىلدان استام ۇزدىكسىز ەڭبەك ءوتىلى ءۇشىن - لاۋازىمدىق جالاقىنىڭ 20 پايىزى؛
* 3 جىلدان استام ەڭبەك ءوتىلى ءۇشىن - 30 پايىزى؛
* 5 جىلدان استام ەڭبەك ءوتىلى ءۇشىن - 50 پايىزى.
جاڭا شارا مەديتسينالىق كادرلاردى، ەڭ الدىمەن، مەديتسينالىق-سانيتاريالىق العاشقى كومەك ۇيىمدارى مەن اۋىلدىق مەديتسينالىق ۇيىمداردا تۇراقتاندىرۋعا باعىتتالعان.
- مەملەكەت باسشىسىنىڭ قولداۋىمەن مەديتسينالىق العاشقى كومەك بۋىنىنىڭ كادرلىق الەۋەتىن نىعايتۋ ءۇشىن العاش رەت وسىنداي اۋقىمدى قولداۋ شارالارى قابىلدانىپ وتىر. ءبىزدىڭ باسىمدىعىمىز - ەمحانالار مەن اۋىلدىق دارىگەرلىك امبۋلاتوريالاردا حالىققا كورسەتىلەتىن مەديتسينالىق كومەكتىڭ ساپاسى مەن قولجەتىمدىلىگىن ارتتىرۋ. بۇل جالپى پراكتيكا دارىگەرلەرى مەن ۋچاسكەلىك قىزمەت مەيىرگەرلەرىنىڭ بىلىكتىلىگى مەن تاجىريبەسىنە تىكەلەي بايلانىستى، - دەپ اتاپ ءوتتى دەنساۋلىق ساقتاۋ ءمينيسترى.
ۇزدىكسىز ەڭبەك ءوتىلى ءۇشىن قوسىمشا اقى ەنگىزىلگەننەن كەيىن اۋىلدىق جەرلەردەگى ەڭ جوعارى ەڭبەك ءوتىلى بار جالپى پراكتيكا دارىگەرلەرىنىڭ جالاقىسى قوسىمشا اقىنى ەسكەرگەندە 760 مىڭ تەڭگەگە، ال قالالاردا 607 مىڭ تەڭگەگە دەيىن جەتۋى مۇمكىن.
اۋىلدىق جەرلەردە ەڭ جوعارى ەڭبەك ءوتىلى بار جالپى پراكتيكا دارىگەرلەرىنىڭ جالاقىسى 534 مىڭ تەڭگەدەن 760 مىڭ تەڭگەگە دەيىن، ال ورتا مەديتسينا پەرسونالىنىڭ جالاقىسى 284 مىڭ تەڭگەدەن 401 مىڭ تەڭگەگە دەيىن ءوسۋى مۇمكىن.
قالالاردا ەڭ جوعارى ەڭبەك ءوتىلى بار جالپى پراكتيكا دارىگەرلەرىنىڭ جالاقىسى 425 مىڭ تەڭگەدەن 607 مىڭ تەڭگەگە دەيىن، ال ورتا مەديتسينا پەرسونالىنىڭ جالاقىسى 224 مىڭ تەڭگەدەن 318 مىڭ تەڭگەگە دەيىن ارتۋى ىقتيمال.
ەڭ از ەڭبەك ءوتىلى بار مامانداردىڭ ەڭبەكاقىسىن ارتتىرۋ دا كوزدەلگەن. اۋىلدىق جەرلەردە جالپى پراكتيكا دارىگەرلەرىنىڭ جالاقىسى 386 مىڭ تەڭگەدەن 450 مىڭ تەڭگەگە دەيىن، ال ورتا مەديتسينا پەرسونالىنىڭ جالاقىسى 221 مىڭ تەڭگەدەن 256 مىڭ تەڭگەگە دەيىن ءوسۋى مۇمكىن.
قالالاردا ەڭ از ەڭبەك ءوتىلى بار جالپى پراكتيكا دارىگەرلەرىنىڭ جالاقىسى 307 مىڭ تەڭگەدەن 358 مىڭ تەڭگەگە دەيىن، ال ورتا مەديتسينا پەرسونالىنىڭ جالاقىسى 173 مىڭ تەڭگەدەن 202 مىڭ تەڭگەگە دەيىن كوتەرىلۋى ىقتيمال.
مەديتسينالىق العاشقى كومەك بۋىنىندا جۇمىس ىستەيتىن پسيحولوگتار مەن الەۋمەتتىك قىزمەتكەرلەرگە دە قوسىمشا قولداۋ كورسەتۋ ۇسىنىلىپ وتىر. ولاردىڭ قىزمەتىنىڭ ەرەكشەلىگىن ەسكەرە وتىرىپ، پسيحوەموتسيالىق جۇكتەمەسى ءۇشىن قوسىمشا اقى ەنگىزۋ ماسەلەسى قاراستىرىلۋدا.
دەنساۋلىق ساقتاۋ مينيسترلىگىنىڭ مالىمەتىنشە، مەديتسينا قىزمەتكەرلەرىنىڭ جالاقىسىن ارتتىرۋ جۇمىستارى 2021 -جىلدان باستاپ كەزەڭ-كەزەڭىمەن جۇرگىزىلىپ كەلەدى.
ينفەكتسيالىق قىزمەت پەن جەدەل مەديتسينالىق جاردەم قىزمەتكەرلەرىنە ارنالعان قوسىمشا قولداۋ شارالارى دا ىسكە اسىرىلۋدا. 2026 -جىلدىڭ باسىنان باستاپ ينفەكتسيالىق قىزمەتتىڭ شامامەن 24 مىڭ مامانى مەن جەدەل مەديتسينالىق جاردەمنىڭ 9 مىڭ قىزمەتكەرىنە جوعارىلاتىلعان تولەمدەر قاراستىرىلعان.
ۇزدىكسىز ەڭبەك ءوتىلى ءۇشىن قوسىمشا اقى ەنگىزۋ تاجىريبەلى مامانداردى قولداۋعا، ەمحانالار مەن دارىگەرلىك امبۋلاتوريالاردا جۇمىس ىستەۋگە ىنتالاندىرۋعا، سونداي-اق مەديتسينالىق كادرلاردى، اسىرەسە اۋىلدىق جەرلەردە، تۇراقتاندىرۋعا باعىتتالعان.
بۇل شارالاردى ىسكە اسىرۋ ۋچاسكەلىك قىزمەتتى نىعايتۋعا، كادر تاپشىلىعىن ازايتۋعا جانە حالىق ءۇشىن مەديتسينالىق كومەكتىڭ قولجەتىمدىلىگىن ارتتىرۋعا مۇمكىندىك بەرەدى دەپ كۇتىلۋدە.
ايتا كەتەلىك 1-قاڭتاردان ۋچاسكەلىك قىزمەت ماماندارىنىڭ جالاقىسى 40 پايىزعا دەيىن ارتاتىنى تۋرالى جازعان ەدىك.