ۆيتسە-پرەمەر زەينەتاقى جيناعىن ەرتە شەشىپ الۋدى توقتاتۋ ۇسىنىسىنا پىكىر ايتتى
استانا. KAZINFORM - ۇكىمەت باسشىسىنىڭ ورىنباسارى تامارا دۇيسەنوۆا ءبىرىڭعاي جيناقتىق زەينەتاقى قورى قورىنداعى اقشانى ەرتە شەشىپ الۋعا تىيىم سالۋ ماسەلەسىنە تۇسىنىك بەردى.
«ساراپشىلار مەن قارجىگەر-ەكونوميستەردەن زەينەتاقى قورىنداعى ارتىق اقشانى مەرزىمىنەن بۇرىن شەشىپ الۋدى توقتا تۇرۋ كەرەك دەگەن ۇسىنىستار ءتۇسىپ جاتىر. ويتكەنى ونداعى قارجى كىرىس رەتىندە سانالادى جانە ونى ادام زەينەتكە شىققاندا الادى»، - دەدى تامارا دۇيسەنوۆا ءماجىلىستىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
ونىڭ ايتۋىنشا، بۇل ۇسىنىس تالقىلانادى. ياعني زەينەتاقى جيناعىنداعى قارجىسىن ەرتە شەشىپ العىسى كەلەتىن ادامدار مەن زەينەتكەرلەردىڭ مۇددەسى ەسكەرىلەدى.
«سوندىقتان ءبىز بۇل ۇسىنىستى تالقىلاپ، جان-جاقتى پىسىقتايمىز. ۇسىنىس بىزگە كەلىپ ءتۇستى. ۋاكىلەتتى ورگان جۇمىس توبىن قۇردى. مەنىڭ ويىمشا، 2-3 ايدا وسى ماسەلە قارالادى. جىلدىڭ سوڭىندا ولار وزدەرىنىڭ ۇسىنىستارىن جاريالايدى»، - دەدى ۆيتسە-پرەمەر.
بۇدان بۇرىن حابارلانعانداي، ەلىمىزدە كەيبىر ساراپشىلار زەينەتاقى قورىنداعى جيناقتى ەرتە شەشىپ الۋدى توقتاتۋدى ۇسىندى. وسىعان وراي ەڭبەك جانە حالىقتى الەۋمەتتىك قولداۋ ءمينيسترى سۆەتلانا جاقىپوۆا پىكىر ءبىلدىردى.