ۆيتسە-پرەمەر: قازاقستان كومىر ەنەرگەتيكاسىنان ءبىر ساتتە باس تارتا سالمايدى

استانا. KAZINFORM - پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ ورتالىق ازيا وڭىرلىك ەكونوميكالىق ىنتىماقتاستىعىنىڭ مينيسترلەر كونفەرەنتسياسىندا جاھاندىق ەكولوگيا ستاندارتتارى ەلدىڭ ەنەرگەتيكا جۇيەسىنە قالاي اسەر ەتىپ جاتقانىن ايتتى.

«شىن مانىندە ءبىزدى قازىر ۇسىنىلىپ جۇرگەن جوعارى ستاندارتتارعا ساي بولۋ ءۇشىن ماڭىزدى جۇمىس كۇتىپ تۇر. ەكولوگيا مينيسترلىگى جۇمىس جۇرگىزىپ جاتىر دا. قازىر دەكاربونيزاتسيا، ءوندىرىس شىعارىندىلارىنىڭ كۆوتاسىن ساتۋ باعىتىنداعى جەكە تاسىلدەر دايىندالىپ جاتىر. مەنىڭ ويىمشا، ءبىز قولعا الىپ جاتقان جاڭا وندىرىستەر بارلىق تەحنولوگيالىق پارامەترلەرگە سايكەس كەلەدى. ءبىز قازىر زاماناۋي تەحنولوگيالاردى بۇكىل جەردە قولدانۋعا تىرىسىپ وتىرمىز. ءتىپتى قورشاعان ورتاعا زياندى بولىپ تۇرعان كومىر ستانتسيالارىنا دا. باتىس ەلدەرى قازىردىڭ وزىندە كومىر ەنەرگەتيكاسىنان باس تارتىپ جاتىر. حالىقارالىق ينستيتۋتتار مۇنداي جوبالاردى قارجىلاندىرۋدى توقتاتتى»، - دەدى ول ب ا ق وكىلىنىڭ سۇراعىن بەرگەن جاۋابىندا.

ۆيتسە-پرەمەر قازاقستان جاسىل ەنەرگەتيكانىڭ جيىنتىق قۋاتى 10 مىڭ مەگاۆاتقا دەيىن جەتكىزۋدى جوسپارلاپ وتىرعانىن ەسكە سالدى.

«ءبىز ەكىباستۇزداعى كومىر ستانتسيالارىن جاڭعىرتۋدى قولعا الدىق. وندا شىعارىندىلاردى باسقارۋعا مۇمكىندىك بەرەتىن تەحنولوگيالار بار. ءبىز ءدال قازىر بۇكىل كومىر سالاسىنا بىردەن «كرەست قويمايمىز». ءبىراق شىعارىندىلاردى تەحنولوگيا ارقىلى ازايتا بەرەمىز. قازاقستان الداعى جىلداردا «جاسىل» كوزدەردەن 10 مىڭ م ۆ ت قۋات ءوندىرۋدى جوسپارلاپ وتىر. بۇل جەل، كۇن، سۋ ەلەكتر ستانتسيالارى دەگەن ءسوز»، - دەدى نۇرلان بايبازاروۆ.

بۇعان دەيىن بايبازاروۆ سانكتسياعا تۇسكەن قازاقستاندىق كومپانيالارعا قاتىستى پىكىر بىلدىرگەن ەدى.