ۆيتسە-پرەمەر بيۋدجەت قارجىسىن يگەرە الماعان مينيسترلىكتەر مەن اكىمدىكتەردى اتادى

 بۇگىن ۇكىمەت وتىرىسىندا پرەمەر-ءمينيستردىڭ ورىنباسارى - قارجى ءمينيسترى ەرۇلان جاماۋبايەۆ بيۋدجەت قاراجاتىن ەڭ كوپ يگەرە الماعان مينيسترلىكتەر مەن اكىمدىكتەردى اتادى، دەپ حابارلايدى Kazinform اگەنتتىگىنىڭ ءتىلشىسى. 

ونىڭ اتاپ وتۋىنشە، 9 ايدا مەملەكەتتىك بيۋدجەتتىڭ شىعىستارى - 99,3، رەسپۋبليكالىق بيۋدجەتتىڭ شىعىستارى - 99,6، جەرگىلىكتى بيۋدجەتتەردىڭ شىعىستارى 99,5 پايىزعا ورىندالدى. رەسپۋبليكالىق بيۋدجەت بويىنشا سوماسى 16 تريلليون تەڭگەگە شىعىستار جۇرگىزىلدى.

«اتقارىلماۋ 70 ميلليارد تەڭگەنى قۇراسا، ونىڭ ىشىندە ۇنەمدەۋ - 16 ميلليارد تەڭگە. يگەرىلمەگەنى - 54 ميلليارد تەڭگە. يگەرىلمەۋدىڭ نەعۇرلىم ءىرى سومالارى ەكولوگيا جانە تابيعي رەسۋرستار، تۋريزم جانە سپورت، ىشكى ىستەر جانە توتەنشە جاعدايلار مينيسترلىكتەرىندە قالىپتاستى. يگەرىلمەۋدىڭ نەگىزگى سەبەپتەرى: كونكۋرستىق راسىمدەردى ۇزاق مەرزىمدە وتكىزۋ؛ شارتتاردى، قوسىمشا كەلىسىمدەردى جاساسۋ راسىمدەرىن ۇزاق جۇرگىزۋ؛ شوت- فاكتۋرالار مەن اتقارىلعان جۇمىس اكتىلەرىن ۋاقىتىلى ۇسىنباۋ جانە باسقالارى»، - دەدى مينيستر.

ەرۇلان جاماۋبايەۆتىڭ دەرەگىنشە، جەرگىلىكتى بيۋدجەتتەردىڭ شىعىستارى 9 تريلليون تەڭگەنى قۇرادى. اتقارىلماعانى - 49 ميلليارد تەڭگە.

«بيىل وڭىرلەرگە 2 تريلليون تەڭگەگە جۋىق نىسانالى ترانسفەرتتەر كوزدەلگەن. ولارعا 1-قازانعا 1 تريلليون 112 ميلليارد تەڭگە بولىنگەن. ونىڭ 98,5 پايىزى يگەرىلگەن. اتقارىلماعانى - 17 ميلليارد تەڭگە، ونىڭ ىشىندە 1 ميلليارد تەڭگە - ۇنەمدەۋ، 16 ميلليارد تەڭگە يگەرىلمەگەن. ەڭ كوپ يگەرىلمەۋ استانا قالاسى، ماڭعىستاۋ، اتىراۋ جانە قاراعاندى وبلىستارىندا قالىپتاستى»، - دەدى مينيستر.