ۆيتسە-مينيستر: اۋىلدىق بيۋدجەتتەردىڭ ءوزىن-ءوزى قامتاماسىز ەتۋ مۇمكىندىگىن ارتتىرۋ قاجەت

استانا. KAZINFORM - ماجىلىستە جەرگىلىكتى ءوزىن- ءوزى باسقارۋ ماسەلەلەرى مەن اۋدان، اۋىل اكىمدەرىنىڭ جۇمىس تاجىريبەسىن تالقىلاۋ بويىنشا قوعامدىق پالاتانىڭ وتىرىسى ءوتتى، دەپ حابارلايدى ەكونوميكا مينيسترلىگىنىڭ باسپا ءسوز قىزمەتى.

ۇلتتىق ەكونوميكا ۆيتسە- ءمينيسترى باۋىرجان وماربەكوۆتىڭ ايتۋىنشا، جەرگىلىكتى ءوزىن- ءوزى باسقارۋدى دامىتۋ جونىندەگى شارالار 2021 -جىلى قابىلدانعان جەرگىلىكتى ءوزىن- ءوزى باسقارۋدى دامىتۋدىڭ 2025 -جىلعا دەيىنگى تۇجىرىمداماسى اياسىندا ىسكە اسىرىلۋدا.

«وتكەن جىلدىڭ باستى رەفورمالارىنىڭ ءبىرى 42 اۋدان مەن وبلىستىق ماڭىزى بار 3 قالا اكىمدەرىنىڭ پيلوتتىق سايلاۋى بولدى. اۋداندىق ماڭىزى بار قالالاردىڭ، اۋىلداردىڭ، كەنتتەردىڭ جانە اۋىلدىق وكرۋگتەردىڭ اكىمدەرىن سايلاۋ جالعاسۋدا. بارلىعى اۋىل اكىمدەرىنىڭ 93 پايىزى (2176 اۋىل اكىمى) سايلاندى. ءالى دە 169 اۋىل اكىمى سايلانادى. 2025 -جىلدان باستاپ بارلىق اۋداندار مەن وبلىستىق ماڭىزى بار قالالاردىڭ اكىمدەرى عانا سايلاناتىن بولادى»، - دەپ اتاپ ءوتتى ۆيتسە- مينيستر.

ب. وماربەكوۆتىڭ ايتۋىنشا، ەڭ وزەكتى ماسەلە - اۋىل بيۋدجەتىنىڭ كىرىس كوزدەرىن كەڭەيتۋ. بيۋدجەتتىڭ IV دەڭگەيى ەنگىزىلگەن ساتتەن باستاپ (2018 -جىل) تۇسىمدەر ديناميكاسى 2 ەسەگە ۇلعايدى. 2023 -جىلدىڭ قورىتىندىسى بويىنشا IV دەڭگەيدەگى بيۋدجەتكە جوسپار بويىنشا 308 ميلليارت تەڭگە ءىس جۇزىندە 320 ميلليارت تەڭگە ءتۇستى. ءوزىن- ءوزى قامتاماسىز ەتۋ ۇلەسى !,2 قۇرادى.

«ءبىراق بۇل اۋىلداردى دامىتۋ ءۇشىن جەتكىلىكسىز. اۋىلدىق بيۋدجەتتەردىڭ ءوزىن-ءوزى قامتاماسىز ەتۋ مۇمكىندىگىن ارتتىرۋ قاجەت. اۋىلدىق بيۋدجەتتەردىڭ كىرىس كوزدەرىن كەڭەيتۋ جۇمىستارى جالعاسادى. IV دەڭگەيدەگى مەنشىكتى كىرىس 4 ەسەگە ارتادى دەپ كۇتىلۋدە»، - دەپ قوستى ۇ ە م باسشىسىنىڭ ورىنباسارى.

بۇعان قوسا، اۋىل اكىمدەرىنىڭ بيۋدجەتىن قالىپتاستىرۋ مەن جۇمساۋ تەتىگىن قايتا قاراۋ قاجەتتىلىگى بار. 2018 -جىلدان باستاپ IV دەڭگەيدە جۇمىس ىستەيتىن بيۋدجەتتىك پروتسەستەر جەتىلدىرۋدى تالاپ ەتەدى. اۋىلدىق وكرۋگتەرگە بيۋدجەتتى ءبولۋدىڭ جاڭا تەتىگى قاراستىرىلۋدا، وندا بيۋدجەتتىك باعدارلامالاردى 17-دەن 4-كە دەيىن ۇلعايتۋ كوزدەلگەن.

ەسكە سالساق، بۇعان دەيىن ءماجىلىس دەپۋتاتى اناس باققوجايەۆ اۋىل اكىمدەرىنىڭ بەدەلىن، قۇزىرەتىن كوتەرۋ ماسەلەسىن كوتەرگەنىن حابارلاعانبىز.

اۆتور

اينۇر تۋماكبايەۆا