گيتلەردىڭ ءوز-وزىنە قول سالۋىنا قاتىستى قۇپيا مالىمەتتەر جاريالاندى

رەسەيدىڭ ف س ب قىزمەتى ادولف گيتلەردىڭ اعا جەكە كومەكشىسى - س س شتۋرمباننفيۋرەرى حاينس لينگەنىڭ تەرگەۋ كەزىندەگى جاۋاپتارى تۋرالى ەگجەي-تەگجەيلى مالىمەتتەردى جاريالادى، دەپ حابارلايدى Ulysmedia.kz.

«كوممەرسانت» باسىلىمىنىڭ جازۋىنشا، 1945 -جىلى لينگە ماسكەۋگە تەرگەۋگە جەتكىزىلىپ، گەرمانيانىڭ تىزە بۇگۋىنىڭ الدىندا بولعان سوڭعى كۇندەر جايلى بايانداعان. اسىرەسە، ول فيۋرەردىڭ ولىمىنە قاتىستى جايتتاردى سيپاتتاپ بەرگەن.

30-ءساۋىر كۇنى ساعات تورتكە ون بەس مينۋت قالعاندا گيتلەر گەببەلستىڭ قابىلداۋ بولمەسىنە كىرىپ، قوشتاسۋعا كەلگەنىن ايتتى. مەن ءدال سول كەزدە قابىلداۋ بولمەسىندە وتىرعانمىن. گەببەلس ونى ىشكە شاقىرعىسى كەلدى، ءبىراق گيتلەر ودان باس تارتىپ، شەشىمى وزگەرمەيتىنىن ايتتى. ول گەببەلس حانىممەن جانە دوكتور گەببەلسپەن قوشتاسىپ، ءوز كابينەتىنە قايتا كەتتى. كەيىن مەن جانە كريۋگەر كابينەتتەن شىقتىق... ارادا بەس مينۋت وتپەي جاتىپ، وق اتىلعان دىبىس ەستىلدى. مەن بۇل جايىندا بىردەن كۇتۋشى زالدا وتىرعان بورمانعا حابار بەردىم، - دەلىنگەن ارحيۆ قۇجاتتارىندا.

الايدا كەيىنىرەك لينگە العاشقى كورسەتىلىمىن وزگەرتىپ، ءوزى وق داۋىسىن ەستىمەگەنىن، تەك وق اتىلعاننان كەيىنگى كۇيىك ءيىسىن سەزگەنىن ايتقان. ول ولگەن ادامنىڭ فيۋرەردىڭ(كوسەمنىڭ) سىڭارى بولۋى مۇمكىن ەمەس ەكەنىن العا تارتقان، سەبەبى گيتلەردىڭ سىڭارى بولماعانىن مالىمدەگەن. ونىڭ ايتۋىنشا، بولمەدە تەك ءبىر عانا ەسىك بولعان، سوندىقتان شىنايى فيۋرەردىڭ بايقالماي قاشىپ شىعۋى مۇمكىن ەمەس.

ايتا كەتەيىك، 2017 -جىلى فرانسۋز انتروپولوگى فيليپپ شارلە ادولف گيتلەر مەن ونىڭ جۇبايىنىڭ سيانيدپەن ۋلانعانى تۋرالى نۇسقانى راستاعان بولاتىن.

بۇعان دەيىن گەرمانيادا گيتلەردىڭ ورىنباسارىنىڭ ۆيللاسى ساتىلىمعا شىققانى حابارلانعان ەدى.