يتاليالىق اقپارات اگەنتتىگى ق ر پرەزيدەنتى تەلەراديوكەشەنىنىڭ جاڭا سەرىكتەسى بولدى

استانا. KAZINFORM – ق ر پرەزيدەنتى تەلەراديوكەشەنى حالىقارالىق سەرىكتەستەرمەن جاڭالىقتار كونتەنتىمەن الماسۋ سالاسىنداعى قارىم-قاتىناستى دامىتۋدى جالعاستىرۋدا. يتاليالىق «Agenzia Nova» اقپارات اگەنتتىگى مەملەكەتتىك مەدياحولدينگتىڭ 19-سەرىكتەسى بولدى.

بۇگىن ق ر پرەزيدەنتى تەلەراديوكەشەنىنىڭ باسشىسى راۋشان قاجىبايەۆا مەن «Agenzia Nova» اقپارات اگەنتتىگىنىڭ باس ديرەكتورى فابيو سگۋيللانتە ىنتىماقتاستىق جانە ءوزارا تۇسىنىستىك تۋرالى مەموراندۋمعا قول قويدى. بۇل قۇجات «Kazinform» جانە «Agenzia Nova» اقپارات اگەنتتىكتەرى اراسىنداعى ىنتىماقتاستىقتى دامىتۋعا باعىتتالعان.

«قازاقستان «Agenzia Nova» مەن يتاليا ءۇشىن ءارقاشان جاقىن ەل بولدى. كەزىندە اگەنتتىكتە «قازاقستان» دەگەن جەكە ايدار بولعان جانە ءبىزدىڭ وقىرماندار سىزدەردىڭ رەسپۋبليكالارىڭىز تۋرالى كوپتەگەن قىزىقتى مالىمەتتەر الاتىن ەدى. بۇگىنگى كەزدەسۋ قازاقستانمەن قاتار ورتالىق ازيا ايماعىنداعى ءومىر مەن وندا بولىپ جاتقان وقيعالار تۋرالى اقپارات تاراتۋدا جاڭا مۇمكىندىكتەر اشاتىنىنا سەنىمدىمىن»، - دەپ اتاپ ءوتتى ف. سگۋيلانتە.

«كونتەنت الماسۋ سالاسىندا جەتەكشى شەتەلدىك ب ا ق-پەن ارىپتەستىك - پرەزيدەنت تەلەراديوكەشەنىنىڭ ماڭىزدى باعىتتارىنىڭ ءبىرى. رەسمي تۇلعالاردىڭ ساپارلارى مەن ەلدەرىمىزدەگى قوعامدىق- ساياسي وقيعالاردى جاريالاۋ كەزىندە ءوزارا اقپاراتتىق قولداۋ كورسەتۋ قازاقستان مەن يتالياداعى اقپارات اگەنتتىكتەرىنىڭ اۋديتورياسىن ايتارلىقتاي كەڭەيتەدى، سونىمەن قاتار اقپاراتتىق قىزمەتتەردىڭ جۇمىسىن ساپالى جاڭا دەڭگەيگە شىعارۋعا مۇمكىندىك بەرەدى»، - دەپ اتاپ ءوتتى ر. قاجىبايەۆا.

«Kazinform» اگەنتتىگى - قازاقستاندا حالىقارالىق مارتەبەگە يە بولعان العاشقى جەتەكشى مەملەكەتتىك اقپارات اگەنتتىگى. ول 100 جىلدان استام ۋاقىت بويى قازاق، ورىس، اعىلشىن، قىتاي، وزبەك تىلدەرىندە اقپارات تاراتىپ كەلەدى. اقپارات اگەنتتىگىنىڭ ەلىمىزدىڭ بارلىق وڭىرلەرىندە ءوز تىلشىلەرى بار. اگەنتتىكتىڭ حالىقارالىق جەلىسى الەمنىڭ 11 ەلىندە ۇسىنىلعان. ول تاۋلىگىنە 1000 بىرلىككە دەيىن كونتەنت شىعارادى.

«Agenzia Nova» - بالقان، تاياۋ شىعىس جانە افريكا تۋرالى ەڭ ءىرى يتاليا تىلىندەگى اقپارات كوزى جانە حالىقارالىق ساياسات پەن ەكونوميكا تۋرالى جاڭالىقتارعا ارنالعان جەتەكشى يتاليالىق اقپارات اگەنتتىگى. اگەنتتىكتىڭ شتاب-پاتەرى ريمدە ورنالاسقان. جاڭالىقتار جيىنتىعى كۇندەلىكتى 500 دەن استام حابارلامانى قامتيدى.

اۆتور

زارينا تۋعانبايەۆا