يتاليادا «ۇلكەن جەتىلىك» سامميتى ءوتىپ جاتىر
استانا. KAZINFORM - بيىل «ۇلكەن جەتىلىككە» ءتوراعالىق ەتەتىن يتاليانىڭ ۇيىمداستىرۋىمەن بورگو- ەگناتسيادا (يتاليا) «G7» سامميتى ءوتىپ جاتىر.
سامميتكە ەۋروپالىق وداق اتىنان ەۋروپالىق كەڭەس ءتوراعاسى شارل ميشەل جانە ەۋروپالىق كوميسسيا پرەزيدەنتى ۋرسۋلا فون دەر ليايەن قاتىسادى.
ەۋروپالىق كەڭەستە اتاپ وتكەندەي، اپۋلياداعى سامميت «ۇلكەن جەتىلىك» كوشباسشىلارىنا زاڭ ۇستەمدىگىنە نەگىزدەلگەن حالىقارالىق ءتارتىپتى قولداۋعا جانە دامۋشى ەلدەرمەن قارىم-قاتىناستى نىعايتۋعا بەرىك ۇستانىمدارىن كورسەتۋگە مۇمكىندىك بەرەدى.
التى جۇمىس وتىرىسى بارىسىندا قارالاتىن نەگىزگى ماسەلەلەر:
افريكا، كليماتتىڭ وزگەرۋى جانە دامۋ
تاياۋ شىعىستاعى قازىرگى جاعداي
ۋكرايناداعى جاعداي
كوشى- قون
ءۇندى-تىنىق مۇحيتى ايماعى جانە ەكونوميكالىق قاۋىپسىزدىك
جاساندى ينتەللەكت، ەنەرگەتيكا، افريكا جانە جەرورتا تەڭىزى.
سونداي- اق يتاليا ءتوراعالىعى 12 ەل مەن 5 حالىقارالىق ۇيىمنىڭ باسشىلارىن سامميت بارىسىنداعى كەيبىر جۇمىس سەسسيالارىنا قاتىسۋعا شاقىردى.
سامميت سوڭىندا كوشباسشىلار كومميۋنيكە شىعارادى دەپ كۇتىلۋدە.
ايتا كەتەيىك، «ۇلكەن سەگىزدىك» سامميتى 1998 -جىلدان بەرى وتكىزىلىپ كەلەدى. العاشقى كەزدەسۋ 1975 جىلى باستالدى. وعان 6 مەملەكەت باسشىسى قاتىستى (گ ف ر، فرانسيا، ۇلى بريتانيا، يتاليا، جاپونيا، ا ق ش). 1977-جىلدان ولارعا كانادا قوسىلىپ، جەتى مەملەكەت باسشىلارى تۇراقتى تۇردە كەزدەسىپ وتىردى. 1998 -جىلدان باستاپ رەسەي باسشىلىعى دا قاتىسىپ كەلەدى. الايدا، 2014 -جىلى قىرىم ماسەلەسىنەن كەيىن «ۇلكەن سەگىزدىك» مۇشەلەرى سوچيدەگى سامميتتەن باس تارتىپ، بريۋسسەل قالاسىندا رەسەيدىڭ قاتىسۋىنسىز «ۇلكەن جەتىلىك» سامميتىن وتكىزگەن بولاتىن. سودان بەرى «ۇلكەن جەتىلىك» دەپ اتالىپ كەلەدى.
اۆتور
زارينا تۋعانبايەۆا