ىستانبۇلدا رەسەي مەن ۋكراينا كەلىسسوزىنىڭ ەكىنشى راۋندى اياقتالدى
استانا. KAZINFORM - رەسەي مەن ۋكراينا وكىلدەرىنىڭ كەزدەسۋى اياقتالدى. كەلىسسوزدەر ىستانبۇلدىڭ چىراگان سارايىندا جابىق ەسىك جاعدايىندا ءوتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
جالپى، ەكى مەملەكەت دەلەگاتسيالارىنىڭ كەزدەسۋى ءبىر ساعاتتان ءسال استام ۋاقىتقا سوزىلدى. كەلىسسوزگە تۇركيا سىرتقى ىستەر ءمينيسترى حاكان فيدان دا قاتىسىپ، انكارانىڭ بىتىمگەرشىلىك پروتسەسىندەگى دەلدالدىق ءرولىن جالعاستىرۋعا دايىن ەكەنىن راستادى.
كەلىسسوزگە رەسەي تاراپىنان پرەزيدەنتتىڭ كومەكشىسى ۆلاديمير مەدينسكي قاتىستى. رەسەي دەلەگاتسياسىنىڭ قۇرامىندا سىرتقى ىستەر ءمينيسترىنىڭ ورىنباسارى ميحايل گالۋزين، رەسەي قارۋلى كۇشتەرى باس شتابى باس باسقارماسىنىڭ باستىعى يگور كوستيۋكوۆ جانە قورعانىس ءمينيسترىنىڭ ورىنباسارى الەكساندر فومين بولدى.
ۋكراينا دەلەگاتسياسىن قورعانىس ءمينيسترى رۋستەم ۋمەروۆ باسقاردى. وعان سونداي-اق سىرتقى ىستەر ءمينيسترىنىڭ ءبىرىنشى ورىنباسارى سەرگەي كيسليتس جانە بۇرىن ۋكراينا پرەزيدەنتى ۆلاديمير زەلەنسكي بەكىتكەن باسقا دا رەسمي وكىلدەر كىردى.
كەلىسسوزدەردىڭ بۇل راۋندى وسى جىلدىڭ 15-16- مامىرىندا باستالعان ديالوگتىڭ جالعاسى بولدى. ول كەزدە تاراپتار 2022 -جىلدان بەرى العاش رەت دولماباحچە سارايىندا تىكەلەي كەلىسسوزدەر جۇرگىزدى. سول كەزدە ءبىرقاتار الدىن الا كەلىسىمدەرگە قول جەتكىزىلدى. ونىڭ ىشىندە «1000-عا 1000» كەلىسىمى بويىنشا اسكەري تۇتقىندار الماسۋ، بولاشاقتا بەيبىت كەلىسىمگە كەلۋ فورمۋلاسىن تالقىلاۋ، كەلىسىمگە كەلۋ ماسەلەلەرى قارالدى.
23-25 مامىر ارالىعىندا تاراپتار قاقتىعىس باستالعاننان بەرگى ەڭ ءىرى تۇتقىن الماسۋدى ءساتتى جۇزەگە اسىردى. بارلىعى ءۇش كۇن ىشىندە ءار تاراپ 900-دەن استام ادامدى، ونىڭ ىشىندە اسكەري قىزمەتكەرلەردى دە، بەيبىت تۇرعىنداردى دا اۋىستىردى.
رەسەي سىرتقى ىستەر ءمينيسترى سەرگەي لاۆروۆتىڭ ايتۋىنشا، ماسكەۋ ەكىنشى تۋردى ىستانبۇلدا وتكىزۋدى ۇسىنىپ، رەسەيدىڭ بەيبىت رەتتەۋ پرينتسيپتەرىنە دەگەن كوزقاراسىن قامتيتىن مەموراندۋم دايىندادى. قۇجات ءالى جاريالانعان جوق.
ءوز كەزەگىندە ۋكراينا تاراپى ءوز مەموراندۋمدارىنىڭ نۇسقاسىن ۇسىنىپ ۇلگەردى. وندا تەز ارادا اتىستى توقتاتۋ جانە قىرىم، د ح ر، ل ح ر، سونداي-اق زاپوروجە جانە حەرسون وبلىستارىنىڭ رەسەيدىڭ ءبىر بولىگى رەتىندە قۇقىقتىق مارتەبەسىن مويىنداۋدان باس تارتۋ سياقتى ءبىرقاتار نەگىزگى شارتتار بەلگىلەنگەن.
وتىرىستىڭ بارىسى مەن ناتيجەسى تۋرالى ءالى رەسمي تۇسىنىك بەرىلگەن جوق. الايدا تۇركيادا بەيتاراپ پلاتفورمادا كەلىسسوزدەردىڭ جاڭا راۋندىن وتكىزۋ فاكتىسىنىڭ ءوزى قاقتىعىستى ديپلوماتيالىق جولمەن شەشۋ الەۋەتىنىڭ جالعاسۋىنىڭ بەلگىسى رەتىندە قابىلدانادى.
اۆتور
ەركەجان سماعۇلوۆا