ىستانبۇلدا ايگىلى ارتىستەر مەن انشىلەر ەسىرتكى داۋىنا ىلىكتى

قۇقىق قورعاۋ ورگاندارىنىڭ مالىمەتىنشە، تەكسەرىس تىزىمىنە ونداعان تانىمال تۇلعا - اكتەرلەر، انشىلەر جانە بلوگەرلەر كىرگەن.

تەرگەۋ بىرنەشە اپتا بۇرىن باستالعان. تەرگەۋشىلەر ىقتيمال جەتكىزۋشىلەر مەن كليەنتتەردىڭ جەلىسىن انىقتاپ، باقىلاۋ مەن دالەل جيناۋ ناتيجەسىندە پروكۋراتۋرادان ءتىنتۋ مەن تەكسەرۋ جۇرگىزۋگە رۇقسات العان.

مەديتسينالىق ساراپتاما مەن سۇراق-جاۋاپقا شاقىرىلعاندار اراسىندا تۇرىك شوۋ- بيزنەسىنىڭ جۇلدىزدارى - يرەم دەريدجي، حاديسە، كۋبيلاي اكا، دەمەت ەۆگار، بەرراك تيۋزيۋناتاچ، وزگە ءوزپىرينچجي، كاان يىلدىرىم، دۋيگۋ وزاسلان، بيردجە اقالاي، مەتين اقديۋلگەر، مەرت يازىدجىوعلۋ، زيينەت سالي، فەيزا التۋن، سونداي-اق تەلەجۇرگىزۋشى دەفنە ساميەليدىڭ قىزدارى دەرين جانە دەرەن تالۋ بار.

ولاردى ىستانبۇلداعى جاندارمەريانىڭ باس باسقارماسىنا جانە مەديتسينالىق مەكەمەلەرگە جەتكىزىپ، تالداۋ الىنعان. قازىرگى تاڭدا ەشكىمگە رەسمي ايىپ تاعىلعان جوق. تەرگەۋ اياسىندا تەكسەرىس پەن جاۋاپ الۋ جۇرگىزىلىپ جاتىر. ەگەر ساراپتاما ناتيجەسىندە تىيىم سالىنعان زاتتاردىڭ بار ەكەنى انىقتالسا، ءار تۇلعاعا قاتىستى جەكە قىلمىستىق ءىس قوزعالۋى مۇمكىن.

مامانداردىڭ ايتۋىنشا، بۇل وپەراتسيا تۇركيا شوۋ- بيزنەسى تاريحىنداعى ەڭ اۋقىمدى تەكسەرۋدىڭ ءبىرى بولىپ وتىر. تەرگەۋ جالعاسىپ جاتىر، كۇدىكتىلەر ءتىزىمى ءالى دە كەڭەيۋى مۇمكىن.