ىستانبۇلدا اۋدان ءمەرى كۇردتەرمەن بايلانىسى بار دەپ ايىپتالعان سوڭ وپپوزيتسيا كوشەگە شىقتى

استانا. KAZINFORM - ىستانبۇلدىق ساياساتكەر احمەت وزەردىڭ قاماۋعا الىنىپ، قىزمەتىنەن شەتتەتىلۋى وپپوزيتسيانىڭ اشۋىن تۋدىردى.

بيلىك ونى 23-قازاندا انكارا ماڭىنداعى لاڭكەستىك ءۇشىن جاۋاپكەرشىلىكتى ءوز موينىنا العان كۇردىستان جۇمىسشى پارتياسىنا «قاتىسى بار» دەپ ايىپتاپ وتىر، دەپ حابارلايدى euronews.

ىستانبۇلدا جۇزدەگەن ادام قالالىق اۋدانداردىڭ ءبىرىنىڭ ءمەرىنىڭ زاڭسىز كۇردىستان جۇمىسشى پارتياسىمەن بايلانىسى بار دەگەن ايىپپەن تۇتقىندالىپ، قىزمەتىنەن الىنۋىنا نارازىلىق ءبىلدىرۋ ءۇشىن جينالدى.

سارسەنبى كۇنى ىستانبۇلداعى حالىق تىعىز ورنالاسقان ەسەنيۋرت اۋدانىنىڭ اكىمى، وپپوزيتسيالىق رەسپۋبليكالىق حالىق پارتياسىنىڭ مۇشەسى احمەت وزەردى لاڭكەستىكپەن كۇرەس پوليتسياسى ۇستادى.

بەيسەنبىدە ۇكىمەت وزەردىڭ ورنىنا ىستانبۇل پروۆينتسياسىنىڭ ۆيتسەپرەفەكتىن تاعايىندادى، بۇل بيلىكتىڭ تۇركيانىڭ وڭتۇستىك- شىعىسىنداعى كۇردتەردى قولدايتىن مەرلەردى اۋىستىرۋ تاجىريبەسىن ەسكە ءتۇسىرىپ وتىر.

كەمالشىلار كوشباسشىسى وزگيۋر وزەل جانە باسقا دا ساياساتكەرلەر مۇنى «توڭكەرىس» دەپ اتادى. ىستانبۇل ءمەرى ەكرەم يماموگلۋ جانە ەردوعاننىڭ الەۋەتتى باسەكەلەسى ونىڭ وداقتاسىنا جاسالعان شابۋىل - بيلىكتىڭ قالاعا «باقىلاۋدى كۇشەيتۋ» ءادىسى ەكەنىن ايتتى.

بيلىك قالا اكىمدىگى الدىندا شەرۋ وتكىزۋگە تىيىم سالعاننان كەيىن دەمونسترانتتار ىستانبۇلدىڭ باتىس شەتىندەگى بوسفور بۇعازىنىڭ ەۋروپا جاعالاۋىنداعى ەسەنيۋرت الاڭىنا جينالدى.

كەيبىرەۋلەر «ءبىز تاعايىندالعان ءمەردى ەمەس، سايلانعان مەردى قالايمىز» دەگەن جازۋى بار ترانسپورانتتار كوتەرىپ، پرەزيدەنت ەردوعان ۇكىمەتىنىڭ وتستاۆكاعا كەتۋىن تالاپ ەتتى.

64 جاستاعى وزەر - اتاقتى الەۋمەتتانۋشى جانە بۇرىنعى اكادەميك. ناۋرىزدا وتكەن جەرگىلىكتى سايلاۋدا ورتالىق سولشىل رەسپۋبليكالىق حالىق پارتياسى مەن سولشىل كۇردتەردى قولدايتىن DEM اراسىنداعى بەيرەسمي اليانستىڭ ارقاسىندا ول ەسەنيۋرت قالاسىنىڭ ءمەرى بولىپ سايلاندى.

وسىعان دەيىن تۇركيادا 9 ايدا قۇنى 32,6 ميلليارد لير بولاتىن كونتراباندالىق تاۋار تاركىلەنگەنىن جازعان ەدىك.