ىستانبۇل ا ق ش-تىڭ قاتىسۋىمەن رەسەي مەن ۋكراينا اراسىنداعى شەشۋشى كەلىسسوزگە دايىندالىپ جاتىر

استانا. قازاقپارات - 15-مامىر رەسەي-ۋكراينا قاقتىعىسى تاريحىنداعى بەتبۇرىس كەزەڭى بولۋى مۇمكىن. تۇركيا رەسەي، ۋكراينا جانە ا ق ش باسشىلارىنىڭ قاتىسۋى مۇمكىن اۋقىمدى كەلىسسوز الاڭىن دايىنداپ جاتىر، دەپ حابارلايدى Kazinform مەنشىكتى ءتىلشىسى.

حالىقارالىق اقپارات اگەنتتىكتەرىنىڭ حابارلاۋىنشا، ا ق ش پرەزيدەنتى دونالد ترامپتىڭ ەكى ارنايى وكىلى ستيۆ ۋيتكوفف پەن گەنەرال كيت كەللوگ الداعى كۇندەرى ىستانبۇلعا بارادى. سونىمەن قاتار، ترامپتىڭ ءوزى مەملەكەتتىك حاتشى ماركو رۋبيونىڭ قاتىساتىنىن مالىمدەدى.

ا ق ش پرەزيدەنتىنىڭ ايتۋىنشا، «تۇركيادا جاقسى ناتيجە بولۋى مۇمكىن جانە رۋبيو سوندا بارادى».

ۋكراينا پرەزيدەنتى ۆلاديمير زەلەنسكي تۇركيادا ۆلاديمير پۋتينمەن جەكە كەزدەسۋگە دايىن ەكەنىن راستادى. باسپا ءسوز ءماسليحاتىنداعى مالىمدەمەسىندە ول تۇركيا پرەزيدەنتى رەجەپ تايپ ەردوعانمەن كەلىسسوز 15-مامىر، بەيسەنبى كۇنى انكارادا جوسپارلانعانىن حابارلادى. زەلەنسكي پۋتيننىڭ جەكە كەزدەسۋگە كەلىسەدى دەپ كۇتەتىنىن جانە وعان دونالد ترامپتىڭ دا قاتىساتىنىنا سەنىم ءبىلدىردى.

- بۇل كۇشتى ساياسي سيگنال بولار ەدى. ءبىز ەردوعانمەن بىرگە پۋتين ءۇشىن قوسىمشا ىنتالاندىرۋ رەتىندە ترامپتىڭ قاتىسۋىن ۇسىندىق، - دەپ اتاپ ءوتتى ۋكراينا باسشىسى.

بۇل رەتتە كرەملدىڭ باسپا ءسوز حاتشىسى دميتري پەسكوۆ رەسەيلىك دەلەگاتسيانىڭ قۇرامىن جاريا ەتۋدەن باس تارتىپ، پۋتين ونى قاجەت دەپ تاپقان كەزدە ءوزى جاريالايتىنىن باسا ايتتى. وسى ارادا امەريكالىق دەرەككوزدەر ا ق ش بەيسەنبى كۇنى تاڭەرتەڭگە دەيىن رەسەيلىك دەلەگاتسيا تۋرالى رەسمي اقپاراتتى كۇتپەيتىنىن حابارلادى.

ءتۇرلى ساراپشىلاردىڭ پىكىرىنشە، ىستانبۇلدا كەلىسسوز جۇرگىزۋ باستاماسى رەسەي پرەزيدەنتىنە تيەسىلى. الايدا ۆلاديمير پۋتين كەلىسسوزگە جەكە قاتىسا ما، الدە ءوز دەلەگاتتارىن جىبەرە مە، ول بەلگىسىز. بۇل رەتتە زەلەنسكي تومەنگى دەڭگەيدەگى شەنەۋنىكتەرمەن كەزدەسۋگە نيەتى جوق ەكەنىن مالىمدەدى.

پۋتين مەن زەلەنسكيدىڭ كەزدەسۋى وتەتىن بولسا، بۇل تولىق اۋقىمدى قاقتىعىس باستالعاننان بەرى ەكى ەل كوشباسشىلارىنىڭ العاشقى جەكە ديالوگى بولماق. ا ق ش- تىڭ جوعارى لاۋازىمدى شەنەۋنىكتەرىنىڭ قاتىسۋى، اسىرەسە، گەوساياسي تۇراقسىزدىقتى ەسكەرە وتىرىپ، كەلىسسوزگە جاڭا سەرپىن بەرۋى مۇمكىن.

الەم كۇتىپ وتىر. ءبىرقاتار ەلدىڭ بولاشاعى بوسفور جاعاسىنداعى قوناقۇيدىڭ زالدارىندا شەشىلە مە، ول الداعى كۇندەرى بەلگىلى بولادى.

بۇعان دەيىن تۇركيا رەسەي مەن ۋكراينا اراسىنداعى كەلىسسوزدەردى ۇيىمداستىرۋعا دايىن ەكەنىن مالىمدەدى.

اۆتور

زارينا تۋعانبايەۆا