ىستانبۇلداعى ايا-سوفيا مەشىتىنىڭ استىنان عاسىرلار بويى جاسىرىن جاتقان تۋننەلدەر تابىلدى

استانا. KAZINFORM - تۇركيانىڭ ىستانبۇل قالاسىنداعى تاريحي ايا-سوفيا مەشىتىن قالپىنا كەلتىرۋ كەزىندە ماماندار عيمارات استىنان عاسىرلار بويى جاسىرىن جاتقان جەراستى تۋننەلدەرىن انىقتادى. بۇگىنگە دەيىن ولاردىڭ شامامەن 420 مەترى تازارتىلدى، دەپ حابارلايدى Anadolu.

فوتو: Kazinform

تاريحي عيماراتتىڭ استىنان التى جەراستى بولمەسى مەن توعىز تۋننەل تابىلعان. زەرتتەۋشىلەردىڭ بولجامىنشا، ولاردىڭ كەيبىرى ريم داۋىرىنە تيەسىلى بولۋى مۇمكىن.
ماماندار بۇل تۋننەلدەر ەجەلگى قالانى سۋمەن قامتاماسىز ەتۋ جۇيەسىنىڭ ءبىر بولىگى بولعان دەپ ەسەپتەيدى.
اسىرەسە ايگىلى بازيليكا تسيستەرناسى دەپ اتالاتىن جەراستى سۋ قويماسىنا قاراي باعىتتالعان وتكەل زەرتتەۋشىلەردىڭ قىزىعۋشىلىعىن تۋدىرعان.
اتالعان تۋننەلدە ءالى كۇنگە دەيىن سۋ اعىپ جاتىر. الايدا ونىڭ ناقتى قايدان كەلىپ جاتقانى ازىرگە بەلگىسىز.
- سۋ جەراستى كوزدەرىنەن نەمەسە ەجەلگى اكۆەدۋكتەر جۇيەسى ارقىلى كەلۋى مۇمكىن، - دەدى پروفەسسور احمەت گۇلەچ.

قالپىنا كەلتىرۋ جانە زەرتتەۋ جۇمىستارى شامامەن ەكى جىلدان بەرى جالعاسىپ كەلەدى.

وسى ۋاقىت ىشىندە ماماندار جەراستى وتكەلدەرىنەن ءۇش مىڭ تونناعا جۋىق توپىراق پەن قۇرىلىس قالدىقتارىن شىعارعان. زەرتتەلگەن تۋننەلدەردىڭ ەڭ ۇزىنى 200 مەتردەن اسادى.

بولاشاقتا تاريحي جەراستى وتكەلدەرىن تۋريستەرگە اشۋ مۇمكىندىگى قاراستىرىلىپ جاتىر. الايدا بۇل جونىندە تۇپكىلىكتى شەشىم قابىلدانعان جوق.

الدىمەن ماماندار تۋننەلدەردىڭ قاۋىپسىزدىگىن تەكسەرىپ، ولاردىڭ قۇرىلىمدارىن نىعايتۋى قاجەت.