الماتىلىق دارىگەرلەر دۇنيەجۇزىلىك ينسۋلتپەن كۇرەس كۇنىنە وراي وڭىرلىك كوممۋنيكاتسيالار قىزمەتىندە بريفينگ وتكىزدى. ولاردىڭ مالىمەتىنشە، 2025 -جىلى قالاداعى ينسۋلت ورتالىقتارىندا 4757 پاتسيەنت ەمدەلگەن. بۇل بىلتىرمەن سالىستىرعاندا 200 ادامعا كوپ.
— يشەميالىق ينسۋلت كەزىندە، ەگەر پاتسيەنت اۋرۋحاناعا تەراپيالىق تەرەزە كەزەڭىندە جەتكىزىلىپ، ءتيىستى كورسەتىلىم بولسا، العاشقى 4,5 ساعات ىشىندە ترومبوليزيس جۇرگىزىلۋى مۇمكىن. بۇل — ترومبتى ەرىتۋگە ارنالعان ەم. ءىرى قان تامىرى بىتەلگەندە، جەكەلەگەن جاعدايدا ترومبتى مەحانيكالىق جولمەن الىپ تاستايتىن وپەراتسيا جاسالادى. قان قۇيىلۋ كەزىندە ءدارى-دارمەكپەن ەمدەيدى، قاجەت بولسا نەيروحيرۋرگيالىق وپەراتسيا جۇرگىزىلەدى، — دەپ ءتۇسىندىردى الماتىداعى № 7 قالالىق كلينيكالىق اۋرۋحانانىڭ ينسۋلت بولىمشەسىنىڭ دارىگەر-نيەۆرولوگى اقجول ءارىپحان.
دارىگەرلەردىڭ ايتۋىنشا، ينسۋلت ەگدە جاستاعى ادامداردا عانا بولمايدى. الەمدىك دەرەك بويىنشا، جاڭادان تىركەلگەن ناۋقاستاردىڭ شامامەن - ى 15 پەن 49 جاس ارالىعىنداعى ادامدار، پاتسيەنتتەردىڭ جارتىسىنان استامى 70 جاسقا تولماعاندار ەكەن.
— ينسۋلت قاۋپىن ارتەريالىق قان قىسىمىنىڭ جوعارى بولۋى، قانت ديابەتى، حولەستەرين دەڭگەيىنىڭ جوعارىلاۋى، جۇرەك ىرعاعىنىڭ بۇزىلۋى، تەمەكى شەگۋ، ارتىق سالماق پەن قوزعالىستىڭ ازدىعى ارتتىرادى، — دەدى الماتىداعى قوعامدىق دەنساۋلىق ساقتاۋ باسقارماسىنىڭ شتاتتان تىس باس ينسۋلتولوگى، № 7 قالالىق كلينيكالىق اۋرۋحانانىڭ ينسۋلت بولىمشەسىنىڭ مەڭگەرۋشىسى جاننا دۇيسەمبايەۆا.
ينسۋلتتىڭ نەگىزگى بەلگىسى — بەتتىڭ كەنەتتەن قيسايۋى، دەنەنىڭ ءبىر جاعىنداعى قول مەن اياقتىڭ السىرەۋى نەمەسە ۇيۋى، سويلەۋدىڭ بۇزىلۋى، كورۋ قابىلەتىنىڭ ناشارلاۋى مەن تەپە-تەڭدىكتى جوعالتۋ.
دارىگەرلەر FAST ەرەجەسىن ەستە ساقتاۋعا كەڭەس بەرەدى. ەگەر ادامنىڭ بەتى قيسايىپ، ءبىر قولى السىرەپ، سويلەۋدەن قالسا، دەرەۋ 103 نومىرىنە قوڭىراۋ شالۋ قاجەت. بەلگىنىڭ قاشان باستالعانىن ەستە ساقتاپ، مەديسينا قىزمەتكەرىنىڭ نۇسقاۋىنسىز پاتسيەنتكە ءوز بەتىنشە ءدارى-دارمەك، تاماق پەن سۋ بەرۋگە بولمايدى. بەلگىسى وزدىگىنەن باسىلىپ قالسا دا، مىندەتتى تۇردە مەديسينالىق كومەككە جۇگىنگەن ءجون.
40 جاستان كەيىن قان قىسىمىن ۇنەمى ولشەپ، قانداعى قانت پەن حولەستەرين دەڭگەيىن تەكسەرىپ، جۇرەك ىرعاعىن باقىلاپ وتىرۋ كەرەك. قان قىسىمى بىرنەشە رەت 140/90 بولسا، دارىگەرگە بارۋ كەرەك. ال قىسىم 180/120-عا جەتسە، ازامات شۇعىل تۇردە دارىگەرگە قارالۋى ءتيىس.
— الدىن الۋ قان قىسىمىن، قانداعى قانت پەن حولەستەرين دەڭگەيىن ۇنەمى باقىلاۋدان باستالادى. تەمەكى شەگۋدەن باس تارتىپ، دۇرىس تاماقتانىپ، تۇزدى شەكتەپ، كوپ قيمىلداپ، جۇرەك پەن قان تامىرى اۋرۋىن ۋاقىتىندا ەمدەۋ كەرەك. مۇنىڭ ءبارى العاشقى جانە قايتالاما ينسۋلت قاۋپىن ازايتۋعا سەپ بولادى، — دەدى جاننا دۇيسەمبايەۆا.
ينسۋلتتەن كەيىن وڭالتۋدى ۋاقىتىندا باستاپ، دارىگەردىڭ تاعايىنداۋىن ورىنداپ وتىرۋ كەرەك.
— ءجيى كەزدەسەتىن قاتەلىكتىڭ ءبىرى — پاتسيەنتتىڭ جاعدايى جاقسارعان كەزدە تاعايىندالعان ءدارىنى ءىشۋدى توقتاتۋى. بۇل قايتالاما ينسۋلت قاۋپىن ارتتىرادى. وڭالتۋدى دەر كەزىندە باستاۋ مەن پسيحولوگيالىق قولداۋ كورسەتۋ دە اسا قاجەت، — دەدى اقجول ءارىپحان.
دارىگەرلەر ينسۋلت كەزىندە ءار مينۋتتىڭ ماڭىزدى ەكەنىن ەسكە سالادى. پاتسيەنت مامانداندىرىلعان ورتالىققا نەعۇرلىم تەز جەتكىزىلسە، ونىڭ ءومىرىن ساقتاپ قالۋ مەن اۋرۋدىڭ سالدارىن ازايتۋ مۇمكىندىگى سوعۇرلىم جوعارى بولادى.
ەسكە سالايىق، بۇعان دەيىن دارىگەر سۋىق تيگەندە انتيبيوتيك نەگە كومەكتەسپەيتىنىن جانە ونى ءوز بەتىنشە قابىلداۋ نەسىمەن قاۋىپتى ەكەنىن ءتۇسىندىردى.