يسلام ساتپايەۆ پەن الەكساندرا لە: كەلەسى ماقسات - امەريكادا وتەتىن وليمپيادا
الماتى. KAZINFORM - وليمپيادانىڭ قولا جۇلدەگەرلەرى يسلام ساتپايەۆ پەن الەكساندرا لە پاريج تورىندەگى جەڭىسىنە بايلانىستى پىكىر ءبىلدىردى.
«بۇل جۇلدە مەن ءۇشىن كۇتپەگەن جەردەن كەلگەن جوق. ويتكەنى ءبىز وتە جاقسى دايىندىقتان وتتىك. پسيحولوگيالىق تۇرعىدان دايىن بولدىق. وليمپيادا باستالعان كەزدە مەدال الاتىن كۇن تۋعانىن انىق ءبىلدىم. ەندى ءبىزدىڭ كەلەسى ماقساتىمىز - 2027 -جىلى امەريكادا وتەتىن وليمپيادا»، - دەدى مەرگەن.
پاريج وليمپياداسىنىڭ تاعى ءبىر جۇلدەگەرى الەكساندرا لە ەلدى ساعىنىپ كەلگەنىن اتاپ ءوتتى.
«ءبىزدى وسىنداي جىلۋلىقپەن كۇتىپ العاندارىڭىزعا قۋانىشتىمىز. وتانىمىزدى ساعىنىپ قالدىق. ءوز ەلىڭدە جەڭىسىڭ ەرەكشە سەزىلەدى. ءبىز كوپ جىلدار بويى نىسانا كوزدەۋدە ورناعان تىنىشتىقتى بۇزىپ، جۇلدەلى بولعانىمىزدى تەك ءبىر كۇننەن كەيىن تۇسىندىك. سونداي-اق ءبىز قازاقستاندىقتار تەك قانا مىقتى ەمەس، ءارى مەرگەن ەكەنىمىزدى الەمگە دالەلدەدىك»، - دەدى الەكساندرا لە.
نىسانا كوزدەۋدەن قازاقستاننىڭ باس باپكەرى ءوز شاكىرتتەرىنىڭ پاريجدەگى جەتىستىكتەرىن باعالادى.
«سپورتشىلاردىڭ دايىندىعى جاقسى بولدى. سوڭعى ەكى جىل بويى ءبىز ءدال وسى سايىسقا دايىندالدىق. وليمپيادادا ويناتىلعان العاشقى جۇلدەنى جەڭۋ - ۇلكەن جەتىستىك. جالپى نىسانا كوزدەۋدەن 82 ەل جارىسقا قاتىسىپ، تەك 19-ى جۇلدەلى بولدى. ازيا قۇرلىعىندا قازىر باسەكەلەستىك وتە جوعارى. ءبىراق الەم قازىر ءبىزدى تانىپ، بىزدەن ءتىپتى قورقا باستادى. بۇل ءبىز ءۇشىن ماقتانىش»، - دەدى نىسانا كوزدەۋدەن قازاقستاننىڭ باس باپكەرى ولگا ۆياچەسلاۆنا.
ەسكە سالايىق، 27 -شىلدە كۇنى پنيەۆماتيكالىق ۆينتوۆكامەن 10 مەترگە نىسانا كوزدەۋدەن ارالاس كوماندالىق سىندا يسلام ساتپايەۆ پەن الەكساندرا لە وليمپيادانىڭ قولا جۇلدەسىن جەڭىپ الدى.
ايتا كەتەيىك، الەكساندرا لەنىڭ اناسى تاتيانا كوپەيكو قىزىنىڭ جەڭىسىنە بايلانىستى پىكىر بىلدىرگەن بولاتىن.
يسلام ساتپايەۆتىڭ اناسى ءاليا ساتپايەۆا ۇلىنىڭ جەڭىسىنە بايلانىستى وي ءبولىستى.
اۆتور
دوسبول اتاجان