يسپانيا پرەمەر-ءمينيسترى پەدرو سانچەس ەلدىڭ قازا تاپقاندارعا قايعىرىپ كوڭىل ايتىپ جاتقانىن مالىمدەدى. ونىڭ ايتۋىنشا، قايعىلى وقيعانىڭ ءمان-جايى تەكسەرىلىپ، زاڭبۇزۋشىلىقتار انىقتالعان جاعدايدا بيلىك قاجەتتى شارالاردى قابىلدايدى.
— ەگەر جۇردەك تەمىرجول جۇيەسىنە دەگەن سەنىمدى قالپىنا كەلتىرۋ ءۇشىن قاۋىپسىزدىك شارالارىن كۇشەيتۋ قاجەت بولسا، ءبىز مۇنى ىستەيمىز. يسپانيا سياقتى ەل ءۇشىن ءبىر جىلدىڭ ىشىندە جۇردەك تەمىرجولدا ەكى اپاتتىڭ بولۋى — جول بەرۋگە بولمايتىن جاعداي، — دەدى سانچەس.
كولىك ءمينيسترى وسكار پۋەنتەنىڭ مالىمەتىنشە، كومپيۋتەرلىك بايلانىس جۇيەسىندەگى اقاۋعا بايلانىستى قىزىل سيگنال بەرىلىپ، پويىزدار قوزعالىسى اۆتوماتتى تۇردە توقتاعان. الايدا كەيىن Renfe كومپانياسىنىڭ پويىزىن قايتا جۇرگىزۋ تۋرالى قاتە شەشىم قابىلدانعان.
وڭىرلىك ۇكىمەت باسشىسى ەميليانو گارسيا-پاحەنىڭ ايتۋىنشا، اپاتتان قازا تاپقاندار سانى 68 ادامعا جەتكەن. يسپانيانىڭ دەنساۋلىق ساقتاۋ ءمينيسترى مونيكا گارسيا 80 ادامنىڭ زارداپ شەككەنىن، ولاردىڭ 15- ءى اسا اۋىر جاعدايدا جاتقانىن حابارلادى.
وقيعا ورنىندا جەدەل جاردەم بريگادالارى، قۇتقارۋشىلار مەن تىكۇشاقتار جۇمىس ىستەدى. كەمىندە ءۇش ۆاگون تەمىرجول جاعاسىنداعى ەڭىسكە قۇلاعان. ۆاگون سىنىقتارى بەتكەيگە شاشىلىپ كەتكەن. قۇتقارۋشىلار قاراڭعى تۇسكەننەن كەيىن دە زارداپ شەككەندەر مەن قازا تاپقانداردى ىزدەۋدى جالعاستىردى.
جولاۋشىلاردىڭ ءبىرى، 62 جاستاعى سالۆادور ارريسا ۆاگون ىشىندە بولعان جاعدايدى باياندادى.
— مەن ەسىككە جاقىن جەردە ەدىم. باسقا جولاۋشىلار سىرتقا شىعۋ ءۇشىن تەرەزەلەردى سىندىردى. كەيبىر ادامدار ورىندىقتاردىڭ اراسىندا قىسىلىپ قالىپ، قوزعالا الماي جاتتى، — دەدى ول.
وڭىرلىك ۇكىمەت وكىلىنىڭ مالىمەتىنشە، اپات كەزىندە Iryo پويىزىندا 147 ادام، ال Renfe پويىزىندا 397 جولاۋشى بولعان.
تاعى ءبىر جولاۋشى رافاەل بارسەلو سوقتىعىسار الدىندا كوفە الۋ ءۇشىن ورنىنان تۇرعانىن، وسىنىڭ ارقاسىندا قاۋىپتەن امان قالعانىن ايتتى.
— ءبىز تاڭعى اس ءىشىپ، كوفە ءىشىپ وتىرعانبىز. كەنەت قاتتى سوققى سەزىلىپ، ءبارىمىز جوعارى قاراي ۇشىپ كەتتىك، — دەدى ول.
Renfe تەمىرجول وپەراتورى زارداپ شەككەندەردىڭ تۋىستارىنا ارنالعان ارنايى تەلەفون جەلىسىن اشتى. مادريد — اندالۋسيا باعىتى بويىنشا جۇردەك پويىزدارعا بيلەت ساتۋ 13- جەلتوقسانعا دەيىن توقتاتىلدى.
ءبىر جىل ىشىندەگى ەكىنشى ءىرى اپات
بۇل — 2013 -جىلدان بەرى ەۋروپادا بولعان ەڭ ءىرى تەمىرجول اپاتى. سول جىلى يسپانيانىڭ سانتياگو-دە-كومپوستەلا قالاسىندا پويىز رەلستەن شىعىپ كەتىپ، 80 ادام قازا تاپقان ەدى.
قازىرگى قايعىلى وقيعا يسپانيادا جىل باسىنان بەرى بولعان ەكىنشى ءىرى تەمىرجول اپاتى سانالادى. قاڭتاردا ءدال وسى باعىتتا سول كومپانيالار پايدالاناتىن جۇردەك پويىزدار سوقتىعىسىپ، 46 ادام قازا تاپقان بولاتىن.
يسپانيانىڭ ازاماتتىق گۆاردياسى اقپان ايىندا جاريالاعان الدىن الا ەسەبىندە قاڭتارداعى اپاتتىڭ ىقتيمال سەبەپتەرىنىڭ ءبىرى رەتىندە تەمىرجول توسەمىندەگى، رەلستەردەگى نەمەسە جولدىڭ ەكى بولىگىن جالعايتىن دانەكەرلەنگەن تۇستاعى اقاۋلاردى اتاعان. سونىمەن قاتار تەرگەۋشىلەر اپاتتىڭ باسقا دا جەتى ىقتيمال سەبەبىن قاراستىرعان.
ەسكە سالايىق، اپات 28 -قازاندا جەرگىلىكتى ۋاقىت بويىنشا ساعات 08:54 شاماسىندا تولەدو پروۆينتسياسىنداعى ۋردا قالاسىنىڭ ماڭىندا بولعان. جۇردەك تەمىرجول جەلىسىندە مەملەكەتتىك Renfe كومپانياسىنىڭ AVE پويىزى مەن جەكە Iryo تاسىمالداۋشىسىنىڭ پويىزى سوقتىعىسقان.
الدىن الا مالىمەت بويىنشا، Iryo پويىزى تەمىرجولدا توقتاپ قالعان. ونىڭ ارتىنان كەلە جاتقان Renfe پويىزى وعان سوقتىعىسقان. سوقتىعىس سالدارىنان بىرنەشە ۆاگون رەلستەن شىعىپ كەتكەن.
وقيعا ورنىندا قۇتقارۋشىلار، ءورت سوندىرۋشىلەر مەن مەديسينا قىزمەتكەرلەرى جۇمىسىن جالعاستىرىپ جاتىر. مادريد پەن اندالۋسيا اراسىنداعى جۇردەك پويىزداردىڭ قوزعالىسى توقتاتىلدى.
اپاتتىڭ سەبەپتەرى انىقتالىپ جاتىر. الدىن الا قاراستىرىلىپ جاتقان نۇسقالاردىڭ قاتارىندا سيگنال بەرۋ جۇيەسىندەگى اقاۋ مەن ادامي فاكتور بار.
بۇعان دەيىن يسپانيادا پويىزدار سوقتىعىسقان اپاتتان قازا تاپقاندار سانى 64-كە جەتكەنى حابارلانعان بولاتىن.
قازاقستان سىرتقى ىستەر مينيسترلىگى قولدا بار مالىمەت بويىنشا، قازا تاپقاندار مەن زارداپ شەككەندەردىڭ اراسىندا قازاقستان ازاماتتارى جوق ەكەنىن ناقتىلاعان. ۆەدومستۆو اقپاراتتى تەكسەرۋدى جالعاستىرىپ جاتىر.
قازاقستان پرەزيدەنتى يسپانياداعى قايعىلى وقيعاعا بايلانىستى كوڭىل ايتتى.