يسپانياداعى سۋ تاسقىنىنان قازا تاپقاندار سانى 158 ادامعا جەتتى
استانا. KAZINFORM - يسپانيادا نوسەر جاڭبىر سالدارىنان بولعان سۋ تاسقىنىنان قازا تاپقاندار سانى 158 گە جەتتى. بۇل تۋرالى بەيسەنبى كۇنى تۇستەن كەيىن ەلدىڭ توتەنشە جاعدايلار قىزمەتى حابارلادى، دەپ جازادى شينحۋا اگەنتتىگى.
ءبىر عانا ۆالەنسيا اۆتونوميالىق قاۋىمداستىعىندا سەيسەنبى كۇنى كەشتەن سارسەنبىگە دەيىن ايماقتا بولعان سۋ تاسقىنى كەم دەگەندە 155 ادامنىڭ ءومىرىن قيدى، دەپ حابارلادى ايماق بيلىگى.
الەۋمەتتىك جەلىدەگى X جازباسىندا ۆالەنسيانىڭ توتەنشە جاعدايلاردى ۇيلەستىرۋ ورتالىعى قۇتقارۋشىلار زارداپ شەككەندەردى ىزدەۋدى جانە انىقتاۋدى جالعاستىرىپ جاتقانىن ايتتى.
اندالۋسيا مەن كاستيليا- لا- مانچادا تاعى ءۇش ادام قازا تاپتى، دەپ حابارلادى ايماقتىق توتەنشە جاعدايلار قىزمەتى.
يسپانيا پرەمەر-ءمينيسترى پەدرو سانچەس بەيسەنبى كۇنى ۆالەنسياداعى ۇيلەستىرىلگەن جانە بىرىكتىرىلگەن وپەراتسيالار ورتالىعىنا بارىپ، قاتتى جاڭبىر مەن سۋ تاسقىنىنا سەبەپ بولعان توتەنشە اۋا رايى جاعدايى «ءالى دە قاۋىپ ءتوندىرىپ تۇرعانىن» ەسكەرتتى.
يسپانيانىڭ كولىك ءمينيسترى وسكار پۋەنتە نوسەر جاڭبىردان ەكى تۋننەل وپىرىلىپ، پويىز جولدارىن زاقىمداعاننان كەيىن ۆالەنسيا مەن مادريد اراسىنداعى جۇردەك پويىز قاتىناسى كەم دەگەندە ەكى اپتاعا توقتاتىلاتىنىن مالىمدەدى.
ەسكە سالا كەتەيىك، بۇعان دەيىن يسپانيادا ءۇش كۇن ازا تۇتۋ جاريالانعانىن جازعان بولاتىنبىز..