يسپانيادا اپتاپ ىستىق سوڭعى ەكى ايدا 1180 ادامنىڭ ءومىرىن جالمادى

استانا. KAZINFORM - سوڭعى ەكى ايدا يسپانيادا اۋا تەمپەراتۋراسىنىڭ كوتەرىلۋى 1180 ادامنىڭ ولىمىنە سەبەپ بولدى. بۇل تۋرالى ەۋروپالىق ەلدىڭ قورشاعان ورتا مينيسترلىگى مالىمدەدى.

يسپانيالىق دەرەككوزدەردىڭ حابارلاۋىنشا، كوز جۇمعانداردىڭ باسىم كوپشىلىگى - 65 جاستان اسقان ادامدار، ولاردىڭ جارتىسىنان كوبى - ايەلدەر. ەڭ كوپ زارداپ شەككەن وڭىرلەر - ەلدىڭ سولتۇستىگىندە ورنالاسقان گاليسيا، لا-ريوحا، استۋريا جانە كانتابريا. بۇل ايماقتاردا ءداستۇرلى تۇردە جاز مەزگىلىندە تەمپەراتۋرا تومەن بولاتىن، الايدا سوڭعى جىلدارى كۇن كۇرت ىسىپ كەتكەن.

باتىس ەۋروپانىڭ وزگە دە ەلدەرى سياقتى، يسپانيا دا سوڭعى اپتالاردا اپتاپ ىستىقتان زارداپ شەكتى. تەمپەراتۋرا 40°C تان (فارەنگەيت بويىنشا 104 °F) ءجيى اسىپ وتىردى.

قورشاعان ورتا مينيسترلىگى كارلوس Ⅲ اتىنداعى دەنساۋلىق ساقتاۋ ينستيتۋتىنىڭ دەرەكتەرىنە سۇيەنە وتىرىپ، بيىل 16-مامىر مەن 13-شىلدە ارالىعىندا ىستىققا بايلانىستى 1180 ادام قايتىس بولعانىن مالىمدەدى. ال بىلتىر وسى كەزەڭدە بۇل كورسەتكىش نەبارى 114 ادامدى قۇراعان.

- بۇل - ورتاشا تەمپەراتۋرانىڭ بۇرىن- سوڭدى بولماعان دەڭگەيدە كوتەرىلۋىمەن جانە اپتاپ ىستىقتىڭ سالدارىنان ءولىم-ءجىتىمنىڭ كۇرت ارتۋىمەن سيپاتتالاتىن ەرەكشە جاعداي، - دەلىنگەن مينيسترلىكتىڭ حابارلاماسىندا.

اتالعان كەزەڭدە 76 رەت اپتاپ ىستىققا بايلانىستى ەسكەرتۋ جاريالانعان. بىلتىر ءدال وسىنداي كەزەڭدە بىردە-ءبىر ەسكەرتۋ بولماعان.

وتكەن جازدا كارلوس Ⅲ اتىنداعى ينستيتۋتتىڭ دەرەكتەرى بويىنشا، يسپانيادا اپتاپ ىستىققا بايلانىستى 2191 ادام كوز جۇمعان. بۇل كورسەتكىش بيىلعى وسىممەن ۇشتاسىپ وتىر.

بۇعان دەيىن، 9-شىلدەدە جاريالانعان عىلىمي زەرتتەۋ بويىنشا، 2 -شىلدەگە دەيىنگى 10 كۇن ىشىندە ەۋروپانىڭ 12 قالاسىندا اپتاپ ىستىق سالدارىنان شامامەن 2300 ادام قايتىس بولعان.