نيدەرلاندىدا بالا تۋۋ رەكوردتىق دەڭگەيگە دەيىن تومەندەۋىنىڭ سەبەبى بەلگىلى بولدى

2025 -جىلى ەلدەگى تۋۋ كوەففيتسيەنتى 1,42 نى قۇرادى. بۇل ستاتيستيكا جۇرگىزىلە باستاعاننان بەرگى ەڭ تومەن كورسەتكىش. ال كوشى-قوندى ەسەپتەمەگەندە حالىق سانىن تۇراقتى دەڭگەيدە ۇستاپ تۇرۋ ءۇشىن بۇل كورسەتكىش شامامەن 2,1 بولۋى قاجەت.

دەموگراف يان لاتتەننىڭ ايتۋىنشا، جاستاردىڭ بالا سۇيۋگە دەگەن نيەتى ايتارلىقتاي وزگەرمەگەن. ورتا ەسەپپەن ولار ءالى دە ەكى بالالى بولعىسى كەلەدى. الايدا تۇرعىن ءۇي تاپشىلىعى، تابىستىڭ تۇراقسىزدىعى جانە الەۋمەتتىك-ەكونوميكالىق جاعداي كوپتەگەن ادامنىڭ بۇل جوسپارىن جۇزەگە اسىرۋىنا كەدەرگى كەلتىرەدى.

نيدەرلاند ستاتيستيكا باسقارماسىنىڭ (CBS) باس الەۋمەتتانۋشىسى تانيا ترااگ جالدامالى باسپانادا تۇراتىندار مەن ءومىر ءسۇرۋ قۇنى جوعارى وڭىرلەردىڭ تۇرعىندارى اراسىندا بالا تۋۋ كورسەتكىشى تومەن ەكەنىن اتاپ ءوتتى. بۇعان قوسا، سوعىستار مەن كليماتتىڭ وزگەرۋىنە بايلانىستى بەلگىسىزدىك تە اسەر ەتىپ وتىر.

- ساراپشىلار تۋۋ دەڭگەيىنىڭ ۇزاق ۋاقىت بويى تومەن بولۋى ەڭبەك نارىعى مەن دەنساۋلىق ساقتاۋ جۇيەسىنە سالماق تۇسىرەتىنىن ەسكەرتەدى. بولاشاقتا زەينەتكەرلەر سانى كوبەيگەن كەزدە ولاردى قامتاماسىز ەتەتىن ەڭبەككە قابىلەتتى تۇرعىنداردىڭ ۇلەسى ازايۋى مۇمكىن، - دەپ جازدى نيدەرلاندىلىق باسىلىم.

قازىر نيدەرلاند حالقى نەگىزىنەن كوشى-قون ەسەبىنەن ءوسىپ كەلەدى. الايدا ماماندار ميگراتسيانى ماسەلەنىڭ ۇزاقمەرزىمدى شەشىمى دەپ سانامايدى.

مۇنداي جاعداي باسقا ەلدەردە دە بايقالادى. ماسەلەن، وڭتۇستىك كورەيادا تۋۋ كوەففيتسيەنتى شامامەن 0,8 گە دەيىن تومەندەگەن. ەل بيلىگى بالا تۋعاندارعا تولەمدەر مەن تۇرعىن ءۇي سۋبسيديالارىن قوسا العاندا، ءتۇرلى باعدارلامالارعا ميللياردتاعان قارجى جۇمسادى. نورۆەگيادا جاس اتا-انالارعا قارجىلاي قولداۋ كورسەتىلىپ، يكەمدى جۇمىس كەستەسىن ەنگىزۋ جولدارى قاراستىرىلىپ جاتىر.

ال فرانسيادا تۋۋ كوەففيتسيەنتى 1,56 نى قۇرايدى. ەلدە جاستاردى وتباسىن قۇرۋعا ىنتالاندىرۋ شارالارى قولعا الىنعان.

نيدەرلاند ۇكىمەتى ازىرگە بالا تۋۋدى تىكەلەي ىنتالاندىراتىن اۋقىمدى شارالار ەنگىزۋدى جوسپارلاپ وتىرعان جوق. بيلىك مۇنداي ساياساتتىڭ كوبىنە ناتيجە بەرمەيتىنىن نەمەسە اسەرى قىسقا مەرزىمدى بولاتىنىن العا تارتادى.

زەرتتەۋشىلەردىڭ پىكىرىنشە، ماسەلەنى شەشۋ ءۇشىن اتا-انالاردىڭ وتباسىن قۇرۋ جوسپارىن جۇزەگە اسىرۋىنا كەدەرگى كەلتىرەتىن الەۋمەتتىك جانە ەكونوميكالىق توسقاۋىلداردى ازايتاتىن كەشەندى شارالار قاجەت.