يراننىڭ ۆيتسە-پرەزيدەنتى وتستاۆكاعا كەتتى

استانا. KAZINFORM - ماسۋد پەزەشكيان پرەزيدەنتتىك سايلاۋدا جەڭىسكە جەتكەننەن كەيىن بۇل قىزمەتكە كەلگەن يراننىڭ ستراتەگيالىق ىستەر جونىندەگى ۆيتسە-پرەزيدەنتى دجاۆاد زاريف اتالمىش لاۋازىمىن 10 كۇن اتقارعاننان كەيىن وتستاۆكاعا كەتتى.

دجاۆاد زاريف ۇكىمەتكە كانديداتتاردى تاڭداۋى ءتيىس كونسۋلتاتيۆتىك كەڭەستى باسقاردى. پەزەشكيان جەكسەنبى كۇنى پارلامەنتتە مينيسترلىك لاۋازىمدارىنا ۇمىتكەرلەردى تانىستىردى.

زاريف X الەۋمەتتىك جەلىسىندەگى جازباسىندا «ءتورت اپتا بويى كۇندىز-ءتۇنى جۇمىس ىستەپ، مىڭنان استام كانديداتتى قاراستىرعان» ارىپتەستەرىنە ريزاشىلىعىن ءبىلدىردى. الايدا ساياساتكەردىڭ ءوزى كەڭەس باسىنداعى جۇمىسىنىڭ ناتيجەسىنە كوڭىلى تولمايتىنىن مالىمدەدى. ول ايەلدەردى، جاستاردى جانە ەتنيكالىق توپتاردى مينيسترلەر كابينەتىنە قوسۋ تۋرالى ۋادەلەرىن ورىنداي الماعانىنا وكىندى، بۇل ول قولداعان پروگرەسسيۆتى كۇن تارتىبىنەن شەگىنۋدى بىلدىرەدى.

ءبىر كەزدەرى زاريف الەمدەگى ەڭ ءىرى دەرجاۆالارمەن 2015 -جىلعى يادرولىق كەلىسىم بويىنشا كەلىسسوزدەر جۇرگىزدى. ەندى ول اكادەميالىق سالاعا ورالىپ، ىشكى ساياساتقا از كوڭىل ءبولۋدى جوسپارلاپ وتىرعانىن ايتتى. ساياساتكەر 2007 -جىلدان باستاپ تەگەران ۋنيۆەرسيتەتىنىڭ حالىقارالىق قاتىناستار مەكتەبىندە ساباق بەردى.

يران ساياساتىندا زاريف رەفورماتورلار قاناتىنىڭ وكىلى سانالادى. اتاپ ايتقاندا، ول ا ق ش-پەن ديالوگتى جاقتايدى. سول ءۇشىن كونسەرۆاتورلار تاراپىنان ءجيى سىنعا ۇشىرايدى.

ول وتستاۆكاعا كەتەتىنى تۋرالى كوپشىلىككە حابارلاعاننان كەيىن تاعى دا سىننىڭ استىندا قالدى.

يران پارلامەنتىنىڭ مۇشەسى حاميد راساي دجاۆاد زاريفتىڭ جانە وتباسى مۇشەلەرىنىڭ شەتەلدىك ازاماتتىعى بار دەپ ايىپتادى. زاريفتىڭ سىنشىلارى 2022 -جىلدىڭ 2-قازانىندا قابىلدانعان «ماڭىزدى لاۋازىمدارعا تاعايىنداۋ تۋرالى» زاڭعا سىلتەمە جاسايدى. زاڭ ەكى ازاماتتىعى بار ادامدارعا، ولاردىڭ جۇبايلارىنا نەمەسە بالالارىنا «ماڭىزدى» لاۋازىمدارعا، سونىڭ ىشىندە پرەزيدەنتتىڭ كەڭەسشىلەرى نەمەسە ورىنباسارلارى لاۋازىمدارىنا تاعايىندالۋعا تىيىم سالادى.

دۇيسەنبى كۇنگى كەزەكتى جازباسىندا زاريف وتستاۆكاعا كەتۋىنىڭ بىرنەشە سەبەبىن اتادى. سونىڭ ىشىندە بالالارى ا ق ش ازاماتى بولعاندىقتان وعان قىزمەتكە تاعايىندالعاننان كەيىن كوپ قىسىم كورسەتىلگەن.

- زاريف ەڭبەك جولىنىڭ ماڭىزدى بولىگىن نيۋ-يوركتە ب ۇ ۇ-داعى يران ميسسياسىنىڭ ءبىر بولىگى رەتىندە وتكىزدى. بالالارى جۇمىس ىستەپ جۇرگەن كەزىندە سول جاقتا تۋعاندىقتان، اۆتوماتتى تۇردە ا ق ش ازاماتتىعىن الدى. ونىڭ بالالارى قازىر يراندا تۇرىپ جاتقانىمەن، بۇل فاكت زاريفتىڭ ۆيتسە-پرەزيدەنت لاۋازىمىن اتقارۋ قۇقىعىنان ايىردى، - دەپ حابارلايدى يراندىق ب ا ق.

اۆتور
ەركەجان سماعۇلوۆا